Longleng District Task Force senden menogo

Dimapur, Rongchii/April 15 (TYO): India Ato Kilonseri linük ajunga March 3 nü tashi mokdanga ayutsü sangdongba sülen COVID-19 dak sendakba nung Longleng District Task Force jongdak senden ka DC office complex nung menogo. Iba senden ya Deputy Commissioner & Chairman DTF, Longleng M. Shayung Phom lenisüba kübok April 14 nü mena liasü.
Linük mokdanga ayuba mapang inyakyimtem benoka inyaktsü aser sentong balala lepa reprangshiba den nüburtem kümzüka toktsütsü asoshi sensak asemtsü atema senden ayongzüka amen.
Maparen ajak takok nung inyakyonga aoba atema tenüngsang agütsüba den Deputy Commissioner-i, senden ayongba nükjidongji COVID-19 den raratsü asoshi kanga junga renema atatsü aser jenjang balala agia tashidak nungi nüburtem kümzüka toktsütsü asoshi lir ta ashiba den kati ka metongtepi mapang shidak nung jenjang tapet agitsü atema renema alitsü ayongzük.
Paisa, züngsemtem dang iba tashidak nungi Longleng jenboa toktsütsü asoshi shisatsü agütsütsü mepeshi. Lokti tentet balalai teka amteper inyakba aser district administration aser Police nem teyari agütsüba atema tenüngsang agütsüba den Shayung-i, nüburtem parnok ajungtsü atema linük mokdanga ayuba sülen anidaktsü asoshi shisatsü agütsütsü aser azüoktsü, NGO tem dang mepeshi aser ano social media mashiyim amshiba nungi pilaa alitsü ayongzük.
Chief Medical Officer Longleng, Dr. Obangjungla, Medical Superintendent of DHL Dr. Lhouvizotuo Belho aser District Surveillance Officer Dr. Maria Yaden nungeri terenemshiba maparen, inyaksangshi, Makeshift Hospital nung facility agütsüba aser alibatem indang, jana indokba yimya, quarantine makeshift, thermal screening, nüburtem senzüsenpongba indang osang agütsü.
Parnoki ashiba agi, nübu aser mongintem agi anünga liaka sorkari agütsü facility dak ajemdaker inyakyimtem timbaka nükjidong tonga inyaktetogo. Parnokisa, ventilator amshitsü asoshi anesthesiologist maliba osang agütsüba den iba atema nemjema bilemba lemsatep. Ajisüaka iba tebilemtsü ketdangsertem nem metetdaktsüogo aser osang tajung angashitsü imlaa atar, ta ashi.
SP Longleng Yanithung Ezung, ADC Longleng D. Robin, Adl. SP Atopu Sumi, Y.B. Angam public leader, Longdang Temjen V/P PPC, Nokchem Asstt. Comdt. VG aser tanga lenirtemi parnoki tebilemba lemsatep aser jenjang agitsü nüngdaka aliba tem metetdaktsü.
Ken o mapang talangka lemtepba sülen züngsemtemi anosotsü ayokba dokantem anepdang 8:00 ako nungi 12:00 ako tashi lapoktsütsü telemtetba agi. Parnoki, bank aser ATM nung nüburtem tetsüngda ita inyaksangshitsü atema serial number keter token system amshitsü, NST nung ATM booth yanglushitsü, COVID-19 dak sendakba nung temelaba magütsüi aliba I/D cards aser vehicle sticker amshiba nungi pilaa alitsü, District-i ozüng alema mozü bener aruba nokdangtsü asoshi inter state aartsü shibanga ayutsüba, district-i kecha tetsükdaktsü makai tenüngdakba osettem belener arutsü asoshi jenjang agitsü atema onüktem benoka sensaksemogo.
Maneni parnoki district nung aliba nüburtem dang district administration, police aser yakbang nung inyakertem nongita yaritsü mepeshi, shirnok nüburtem asoshi tanenmakai inyakdar.