Longleng nung Coordination senden amen

Longleng, Aami/June 02 (TYO): Longleng District Task Force-i ano coordination senden ka Aami/June 01, 2018 nü conference hall, Deputy Commissioner, Longleng nung menogo; DC Longleng, John Tsulise Sangtam mendenbuba ser iba senden amen.
DC-i züngsemtem dang District nung tetsürtem jenjang ajungkettsütsü atema ano taliba nendaka inyaktsü ajungshia liasü.
District level centre for women, Mahila Shakti Kendra Longleng nung staff tasenpur pelaa agizüka DC-i, nenok indang tongtibang teinyaktsüji BBBP junga amenoktsü aser District nung level balala tsüngda apu laja inyaktsü, iba denji külemi schemes balala inyakyim benoktsü atema lir, ta metetdaktsü.
DLCW nung Women Welfare Officer, Phungla Phom-i power point ajanga asalentong lemsatep. Ibaji SRCW den angatettepa renemba liasü. Laisa State Resource Centre for women kübok staff tem nem hopta ana training agutsüba osang lemsatep.
Kasa senden nung Nodal Officer BBBP & CDPO Longleng, Tauhong Phom-i block level workers indang metetdaktsüba den külemi tarutsü nung DLCW-i inyakba maparen ajak nung pai yariteptsü, ta metetdaktsü.
Iba senden nung District Task Force züngsemtem aser Longleng district kübok school aser institutions balala nungi tekolakpurtem dena liasü.