Longleng nung Global Hand Wash Day mungogo

Dimapur, Mongputeni/Oct. 16 (TYO): “Clean Hands – A Recipe for Health” omen kübok, Good Shepherd School, Longleng nung Mongputeni/October 15 nü Global Hand Washing Day mungogo.
Sanitation & Hygiene Consultant, PHED Longleng, Akala Jamir-i iba sentong nung infection aser tashidak balala nungi kümzüktsü asoshi teka, temang aser temeket tesemtem merüktsüba indang jembi. Sapon agi teka shitokba tongtibang süa jembiba mapang, sapon agi teka shidokba ya mesen aser tashidak balala nungi jenbutsü lenmang tajungtiba lir, ta lai ashi.
Sapon agi teka shidoktsü yimya küma iba tongtibang osang ya kidang kinungertem, medemer aser külemi alirtem den lemsateptsü lai kaketshirtem dang ajungshi. Laisa timi teka shitokba yimyatem sayua liasü.
Iba sentong nung Tsüngrem teyari meshia Good Shepherd School tesayur, Nyiangla-i sarasadem aser kasa school nungi tesayur M. Lithe-i sentong nung adenertem pela agizükba o jembi. Iba sentong ya Cheilong-i ketdangsüa agi aser teka shidokba demonstration nung kaketshirtemi shilem agia liasü.