Longleng nung International Day for Girl Child anogomong among

Longleng, Mongputeni/October 12 (TYO): Mongputeni/Oct. 11 nü Local Football Ground, Longleng nung District Task Force-i ayongzüka Beti Bachao Beti Padhao (BBBP) International Day for Girl Child anogomong mongogo, ta tanü ketdangsertem osang ka ajanga metetdaktsü.
Okila jembidang Longleng Deputy Commissioner, John Tsulise Sangtam-i, iba anogomong amongba nükjidong ya tetsür chanutema tebur den kasa, ta züngshia akhümtsübutsü aser meimtsü atema lir, ta metetdaktsü.
Pai lokti dang kibong aser lokti nung tetsürtem aser jalatem kanga meimtsü aser akhümtsübutsü ayongzükba den külemi tetsürtem anema kecha meinyaktsü ayongzük.
Kasa sentong nung MSK District Coordinator, Tutinungla-i BBBP onük jembi aser tetsürtem dang kidang kibong nung tetsür dak azükba aser ozüng alema tetsürtem dak benshibatem anema ola adoktsü ayongzüka liasü.
Laisa linük yangerba nung shilem agirtem, temeim aser yimjung atema inyaker tetsürtem indang otsü lemsatep.
Christian High School kaketshir kati ‘Voice of a girl child’ metetdakja liasü.
Iba anogomong nungsa Bautung GHSS Longleng kaketshirtemi ken aten, Mt. Carmel School kaketshirtemi Choreography ajanga shilem agi, BBBP omen nung ken tetoktepba nung takok anguri ken aten, Malala Yousafzai taküm otsü nung ajemdaker jilushi tetoktepba nung takok anguri shilem agi, girl child & women nem tetushi agutsü, School tsüngda BBBP omen nung onük jembiba tetoktepba agi, arr atsütep, BBBP yimyim ayim aser tetoktepba balala nung takok angurtem nem sempet lemja liasü.
Iba sentong tenzüka EAC Longleng, Robi Sangtam-i lokti pelaa agizükba o jembi, MSK WWO, P. Phungla-i anküp o jembi, aser St. Joseph School leniba nung iba sentong agia liasü.
Iba sentong nung Longleng kübok school ajak nungi tesayurtem aser kaketshirtem, sorkar ketdangsertem, melungtet telok aser lokti tentet balala nungi lenirtem dena liasü.