Longleng nung Makeshift Hospital lapoktsüogo

Longleng, Rongchii/April 14, 2020 (TYO): Bautung Higher Secondary School, Longleng nung April 14, 2020 nü tongti o jembir Longleng District, Deputy Commissioner, M. Shayung Phom matsüngdang Longleng Town Baptist Arogo, Sannüker, Beau Phom-i Makeshift District Hospital meshiteta sarasadema lapokja liasü, ta sangdong ka ajanga metetdaktsü.
DC, Shayung-i jembiba mapang pai, nüburtem kümzüka yutsütsü asoshi District Hospital aser CMO Office Longleng nung bendanga agüja inyaker doctor, nurse aser medical staff tem nem tenüngsang agüja liasü.
Mozüki nung nübu, medical mongintem aser medical sübosülemtsütem peria maliyongjia, nüburtem tajungtiba nung tenzüktsü/anepalutsü asoshi tang aliba osettsüsettem amshia doctor, nurse aser staff temi meranga inyakba indang pai metetdaktsü.
COVID-19 anema raratsü asoshi jakyim sür inyakertemi pei tata wadang nung ano tali bendanga agütsüshir inyaktsü aser nüburtem nüngdakba peridaktsütsü asoshi Shayung-i mepishia liasü.
State aser district arrtsülen yimtsüng tem indang tensa asadanga aser azüoktsü asoshi police den külemi Medical Department aser sorkar ketdangsertem mazüngi senzüdar, ta paisa metetdaktsü.
Longleng district nung iba wara anema raratsü asoshi sorkar agency tem aser lokti tentet balala, Police aser Medical department temi maneni teyari agütsüba asoshi Shayung-i pelaba metetdaktsü aser tarutsü anogotem nunga iba ama yaritepba den amalitepa inyaka aotsü asoshi pai mepishi.
Sentong tentenzüklen, Longleng Town Baptist Arogo, Sannüker Beau Phom-i Makeshift Hospital Longleng meshiteta sarasademtsü. Iba sentong tembanga District Hospital Longleng, Medical Superintendent, Dr. Lhouvizotuo Belho-i tepela anküp o jembi aser lenmang balala ajanga Medical department nem teyari agütsür ajak dang pai pelaba metetdaktsü. Iba sentong nung Dr. Bongnau Phom mendenti liasü.
Bautung Government Higher Secondary School, Longleng nung Makeshift Hospital lapokba sentong tembangba sülen, iba mozüki nung maparen tenzüka liasü.
District hospital Longleng ya COVID-19 patient tem anepalutsü asoshi amshir asünung, tang nungi tenzüka medical service atema Makeshift Hospital semdangtsü asoshi Longleng nüburtem dang metetdaktsür, ta kasa sangdong nung shia lir.