Longleng nung Peace Festival ayongzüka agi

Longleng nung Peace festival amungdang CTC Choir-i shilem agiba noksa nung angur.

Dimapur, November 16 (TYO) : Clark Centre for Peace Research and Action (CCPRA)-i Phom Baptist Church Association den yaritepa Longleng nung Peace festival ka ayongzüka agi.
Iba sentong nung Clark Theological College principal, Rev. Dr. Takatemjen-i o jembidang ashiba agi, “asenok lenmang tamajung agi pila lir” ta ashi.
“Mokokchung aser Longleng tsüngda kilometer 60 dang tetsüngda itta lir saka lenmang majungba agi tongteprateptsü kanga tasak” ta paisa shisem.
“Tanü mangatettep aser meputep adoka aliba mapang ka nung, aser asenok terata agi sünger aser tammang tensa ka nung, asenoki yimjung osang proktsüla” ta Rev. Dr. Takatemjen-isa ayongzük.
Clark Centre for Peace Research and Action (CCPRA)-i yimjung atema mapa inyakba ya tzüyim nung tzüjang ka mesüker, anungji yimjung asoshi asenok ajaki yaritepa inyaktsüla, ta paisa ashi.
Iba Peace festival ya “Peace: the good news of great joy” omen nung ajemdaker Longleng Town Baptist Church-i par arogo nung ketdangsüa agi. Sentong nung CTC students, Phom Baptist Church Asociation aser Longleng Town Baptist Church nungertem ken ajanga shilem agi aser yimjung atema sarasadem mapang balaka agi.