Longleng nung ‘Sabka Saath Sabka Vikas Sammelan’ sentong kaogo

June 10, 2017 nü Government Higher Secondary School Auditorium, Longleng nung “Sabka Saath Sabka Vikas Sammelan” sentong akadang BJP Longleng District-i sobaliba ken ka agi shilem agiba noksa nung angur. 

Longleng, June 10 (TYO): Honibarnü Government Higher Secondary School Auditorium, Longleng nung BSNL, Longleng, Nagaland SSA, NE-II Telecom Circle den BJP Longleng District-i ayongzüka “Sabka Saath Sabka Vikas Sammelan” sentong kaogo.
Iba sentong nung tesüiba küm asem nung Centre sorkari social welfare, shisaliok, rongsenkettsüng aser tanga terenlok mapa balala inyakba indang sayaba den terenlok indang film tatsüka sayua liasü.
Iba sentong nung tongti tejaokerji Longleng Deputy Commissioner, Y Denngan Avennoho Phom liasü, Longleng district BJP Tir, B Ajoy Phom aser Phom Peoples Council Tir, P Chingan Phom na tetushi tejaoker liasü.
DC-i, Ato kilonser, Narendra Modi-i mangdang yua sentong yanglur lenla ajak nung linük terenlok atema inyak, aser tesüiba küm asem nung linük kanga inogo, ta metetdaktsü.
Iba sentong nung BJP party nung inyakertem, shishilembartem, sepaitem aser intelligent ketdangsertem den nübur aika aden.
Sentong nungsa BJP Longleng District-i sobaliba ken ka aten aser Good Shephard High School-i sobaliba yar tsüngsang agi shilem agi.
Sabka Saath Sabka Vikas Sammelan sentong ya, BJP-i aniba Centre sorkar küm asem ajungba tenüng nung nüburtem dang terenlok osang sangdongtsü atema linük tesem balala nung ayongzüka amunger.