Longleng nung Sakhi-One Stop Centre indang sentong agi

Longleng, September 04 (TYO): Longleng Block atema OSC Longleng-i ayongzüka anogo pongunü tashi Sakhi-One Stop Centre indang awareness sentong agia aruba sülen Mongolbarnü tembangogo, ta ketdangsertem osang ka ajanga metetdaktsü.
Iba sentong ya yim pongu- Bhumnyu, Dangkhao, Oushok, Hukphang, Lingtuk, Mongtikang, Pongching aser Orangkong atema ayongzüka August 30 nungi September 3, 2019 tashi agiogo.
Shisalen sayur aser Centre Administrator (OSC) Longleng, C. Henchem Phom-i Sakhi-One Stop Centre inyakyim aser iba centre nung service balala agütsüba indang metetdaktsü.
Laisa timtem ajangshiba tetsürtem nem legal teyari, medical teyari, police teyari aser centre nung counseling service agütsüba indang metetdaktsü.
Lai telok dang women helpline number 181 indang metetdaktsü; iba ya tetsürtem atema teti lapokja dang lir.
Phom Counsellor (OSC), Nyangyungsangla-i Protection of Women against Domestic Violence Act of 2005 indang metetdaktsüdang lai, tetsürtem anema benshiba balala nungi tetsürtem kümzüktsü atema iba Act ya benok, ta metetdaktsü.
Laisa tetsürtem nem agütsüba legal temeden balala indang metetdaktsü.
Kasa sentong nung Arogo Board, Village Council, Village Level Organizations (VLOs) NRLM, Asha & Anganwadi nung inyakertem aser yimtsüng ajunga nungi lenirtem dena liasü.