Longleng nung SHS Coordination senden agiogo

Longleng, Rongjui/September 23, 2019 (TYO): DC Office, Longleng conference hall nung September 21, 2019 Honibarnü Longleng Town Council-i Swachhata Hi Seva (SHS) nung Coordination senden ka ayongzüka liasü.
Iba senden nung Longleng DC, M. Shayung Phom-i, Longleng tesem ya plastic free district ka kümdaktsütsü asoshi senden nung dena alirtem dang mepishia liasü.
Iba mapatong den külemi, pei meküta aliba tesem, ward, office, school, dokan aser pei talidak merükmerüka ayutsü asoshi, DC-i ajungshia liasü.
Senden nung Administrator Longleng Town Council & ADC, Longleng, D. Robin-i jembiba mapang pai züngsemtem pela agizük aser linük nung Swachhata Hi Seva Awareness Campaign indang rasa ashiba den külemi September 11 nungi tenzüka October 01, 2019 nü tashi district nung inyayimtem aser mapatong achaayanga agitsü aliba indang metetdakja liasü.
SHS mapatong indang nung mapang agia olemtepba sülen, teloki October 1, 2019 matong tsüngda ward, Arogotem, sorkar office aser educational institution shia pei tesem nung plastic bendendaktsütsü asoshi telemtetba agiogo.
Iba maparen ya district administration-i reprangdangtsü aser asadangtsü. Maparen takok ngua inyakertem nem award agütsütsü.
Iba mapatong dak alia, seden nungsa, jila telungtet nung azütem tazüokba meli senzüdaktsüba indang olemtep agia liasü. Iba dak sendakba nung, pei ward nung kibur dang azü timi mesütsü aser ayutsü asoshi ward union tem dang nünglokja liasü. District Administration-isa kasa telemtetbaji sangdongtsü aser ita ka sülen aibelener tem nem tapet temerernshi agütsütsü.
Maneni, iba senden nung Longleng nungi District Administration, Police, ward unions Presidents, Educational Institutions nungi tekolaktem, Chamber of Commerce, SBM Ambassadors, NGOs aser Civil Societies teloktem dena liasü, ta DPRO sangdong ajanga metetdaktsü.