Longleng nung VBKCs den Consultative senden amen

Longleng, February 06 (TYO): Tanü DUDA Guest House, Longleng Town nung Nagaland Beekeeping & Honey Mission (NBHM)-i ayongzüka Longleng district nung Village of Beekeepers Committees (VBKCs) pur atema Sensitization den Consultative senden ka ayongzüka agiogo, ta tanü Team Member Longleng Incharge, Er Nitoshe Kinimi-i sangdong ka ajanga metetdaktsü.
Deputy Secretary aser Team lenir NBHM, T Imtiwapang Aier leniba nung ketdangsertem team kati ninang metsürtem dang nungi osang agitsü atema Longleng district nung aliba Apiaries (ninang metsüdak tesem) balala sema senzüdar. District nung ninang metsüba ajungkettsütsü aser mochitzü tali adokdaktsütsü nükjidong nung Longleng nung aliba VBKCs atema tang mezüng District level Consultative senden menogo.
Iba senden nung jembidang NBHM team leniri district nung ninang metsürtem dang, pei melungjang nungi subsidy sobaliba khenyongi agientsüla, aser purapitetba tasen ajanga tayongzükba ajak koktettsü atema renema alitsüla, ta ayongzük.
NBHM senotsü peria maliba dak sendakba nung pai iba o ya jembi, ajisüaka pai ninang metsürtem dang temelung agüja ninang metsürtem nem senotsü teyari agutsütsü atema NBHM-i senotsü lenmang bushidar, ta metetdaktsü.
Paisa, tamalenbo state-i ninang mochitzü 120 metric tonnes dang adokdakja liasü, ajisüaka 2007 küm NBHM tenzükba sülenbo 2017-18 nungbo 420 metric tonnes adokdaktsü, yamaji chiyungtsüa jenti adokdaktsür, ta metetdaktsü.
Iba dak sendakba nung pai, ninang metsüba yabo tanga aluyimba mapa tasak inyakba ama masü, ajisüaka mapang nüngdaker aser junga anepaluba ajanga mochitzü jenti adokdaktsür, ta ashi.
Paisa VBKCs dang Longleng district nung Beekeepers’ Federation ka tentettsüla, ibaji ajanga allied sectors nungi schemes aser facilities balala angutsü, ta ashi.
“Ninang metsür ajaki scientific yimya nung ninang metsüba junga metettsüla, aji oda mesüra Mission-i teyari balala agutsübaji amajok dang asutsü,” ta pai ashi.
Paisa, tetsürtemi ninang metsüba nung India sorkari temelung agutsür, anungji tetsürtemi ninang metsüba maparen inyaktsüla, kechiyong iba mapa ya ani-belema inyakba mapa ka masü, ta ashi.
Iba senden nung Longleng district kübok VBKC Blocks balala nungi ninang metsür 40 dak tema dena liasü.
Ano külen February 6, 2019 nü Yachem yimdak anogo ananü ‘Basic training on Beekeeping’ tenzükogo. Iba training ya RKVY project kübok NBHM-i ayongzüka liasü.
Iba training camp nung shisalen sayurtemji Er Nitoshe Kinimi, Team Member Longleng Incharge aser Francis Kikon Project Assistant NBHM na lir.
Iba training nung onüktemji: Pollination, Management of Bee Colonies, Division of Bee Colonies aser site selection densema lir.
Iba training programme nung nisung 15 shilem agia dendar.