Longmisa Laishir Telongjem-i metetdaktsür

Dimapur, May 14: Ao Theological Association(ATA) Conference Longmisa nung May 26-28, 2017 tashi agitsü lir, ta Longmisa Laishir Telongjem(LLT)-i sangdong ka nung metetdaktsü.
ATA conference asoshi jelia renemba mapa balala alinung, asen Longmisa Laishir züngsem ajak absent mesüi May 23 tashi nung yim tonga arutsü metetdaktsür, ta LLT sangdong nung shia lir.
ATA conference dak sendakba maparen aika ali nung, item khuret asoshi, Longmisa Laishirtem aser kija kibongtemi May 21 anepdang 5:00 ako nungi pei akokba mapang tashi prayer & fasting agitsü ayongzüker. Ajak mazüngi dang alinung pei talidak dang sentong tajung yanglua agitsü mepishir ta sangdong nungsa shia lir.
Maneni yimtsür yimer aser anükapang ajaki iba sentong temoatsü nung agitettsü atema sarasademtsü ayongzüker aser maparen balala atema Mobile No. 9856860903 / 7005779367, 9856676047 nung tongteprateptsü metetdaktsür, ta LLT-is shisem.