Longpayimsen Baptist Arogo nung Fathers School agi

Dimapur, September 6 (TYO) : September 2 nungi 5, 2015 tashi Kohima Ao Baptist Arogo (KABA)-i Longpayimsen Baptist Arogo nung Fathers School ka ayongzüka agiogo.
Iba sentong nung Rev. Bendang, Associate Pastor-i anir tesayurtem parnok pongo lenisüba nung Tsüngremer temoatsü tulu ma nung takok ngua agi aser iba yimli tulu agütsüba asoshi Longpayimsen Baptist Arogo-i KABA dang pelar, ta sannüker Rev. W. Yanger Aier-i sangdong ka ajanga metetdaktsü.
Fathers School nung Tebutem 38 tashi aden aser parnok nem alima nung Tsüngremi tenzüktsüba kibong ka nung tebu ka jenjang den kinüngtsü aser chirnurtem tsütsü shi aser tanela tsütsü teinyaktsu mapa balala meyipa reprangshitsü tesayubatem agütsü.
Ano tali temeshiba nung pei kibong Tsüngrem den longjema Kodak matong tashi anir aotsü tangazükba jenti liasü, ta LBA sannükerisa sangdong nung shia lir.