Longpayimsen nung FLC sentong agi

Dimapur, November 24 (TYO) : Financial Literacy/inclusion ajungkettsü nükjidong nung November 23, 2016 nü FIF-i nungita NABARD achaayang kübok Longpayimsen yimtak Financial Literacy Camp (FLC) mungogo. Iba sentong State Bank of India, Tsurangkong Branch, Mokokchung aser Care and Support Society na telungjem nung ayong aser sen teyari NABARD, Mokokchung-i agütsü, ta sangdong ka ajanga ashi.
Iba sentong nung DDM, NABARD nungi S. Amarjit Mangang-i, financial inclusion tsütsü NABARD shilemtem rasaa ashi.
Yimtaklirtem dang pai sen rizünga ayutsü aser ayuba yimya den nüngdakba atema tang sen intoktsü angatetbaji kanga tongtibang ta ashi.
Pai, tajangzük tajungba ngutettsü atema scientific yimya nung alu ayimtsüla, ta aluyimertem ayongzük aser aluyimertem dang Farmers Club tem — SHG/JLG, WCC & KCC Programme, PMMY aser Stand Up India Scheme tem tatsü agi rasaa ashi.
State Bank of India, Tsurangkong, Mokokchung nung Branch Manager, Moasunup Imchen-i Bank inyakyim, sen rizünga ayutsü aser sen kechi koma ketdang asütsü itemji lemsatepdang bank ajanga nüburtem nem sen teyari tapu balala agütsüba dena shisem.
Paisa PMJDY, PMSBY, PMJJBY aser APY scheme tem telung tongi ia rateta ashi dang tax magütsüi jenbutsü merangertemi nenok indang account tem nung sen inoka ayutsü asüngdangba nung metsüktsüla kechiba süra ibaji ozüng anema lir aser aibelenertem ozüng dak ajemdaker merenshitsü, ta ashi.
Iba sentong Care and Support Society Managing Director-i ketdang asü aser Longpayimsen Baptist Arogo nungi Deacon N. Maken-i sentong tenzüka sarasademba sülen Longpayimsen Village Council Chairman B. Sashi Aier-i tarurtem ajak pela agizükba o jembi.