Longpayimsen nung ‘Theatre workshop’ ka kaogo

Mkg, August 11 (TYO): Longpayimsen yimtak, August 5 nungi 9, 2015 nü tashi Longpayimsen Baptist Church Youth Department (LBCYD)-i ayonga lanurtem asoshi ‘theatre workshop’ ka kaogo. Yimtsüng nung aliba lanurtemi anünga aliba nüburtem dang Tsüngrem osang sangdongba nung aser Khristan tesayubatem/tangatetbatem nung tali tongteprateptettsü asoshi jilushi (theatre) ya tongtibang hadir ka lir, ta angateta iba nükjidong nung iba sentong ayongzüka mungogo.
Iba workshop ya jilushi aser jilushi tatsü (skit) koma yanglutsü, ibaji angazüktsü aser sayutsü nükjidong nung ayongzük, koba ajanga külem tamangertem den Khristan tesayuba nung tajung ba tongteprateptettsü, ta LBCYD, Youth Director Wb. I Lima Lemtur-i sangdong ka ajanga metetdaktsü.
Paisa, tanü asüng tensa nung joko Arogo aika nung tekülem agiba mapang purapitetba tasen ajanga shilem tajung agiba nung rangloker aoer aser tekülem tajungba agitsü asoshi nüburtemia lanurtem dak teimla ajak ayur, ta kasa sangdong ajangasa ashi.
Iba dak alia iba workshop akaba ajanga lanurtemi pei sasa pei dak keta aliba sempet aika jangjaogo aser ibaji ajanga tarütsü nung parnok taküm asoshi jenjang tajungba kümdaktsütsü. Iba sentong nung shisalen sayurji NSD alumni & Artistic Director of Hill Theatre, Bendang Walling liasü.