Longpok nung jajatsü train lenmang talangtiba lapokogo

Geneva, December 11 (Agencies): Nisung mener alima nung lungpok talangtiba ajanga train jajatsü tenzükogo. Iba lungpok ya Swiss Alps tenemtem ajanga Zurich nungi Lugano tashi senzütsü Deobar anogo tenzükogo.
Iba nüngtugu Gotthard Base Tunnel (GBT) ya Europe linüktem nungi lenir German Chancellor Angela Merkel aser France Tir Francois Hollande nungeri June ita lapokba sentong agia liasü.
Swiss nunger sen 12 billion ($11.8 billion, 11.2 billion euros) intoka küm 17 nung renemtetba lenmang ya kilometer 57 (35 miles) lir, ta Swiss national rail service (SBB) ajanga sangdong ka nung metetdaktsü.
GBT nung jajatsü asoshi nisung amenba train anepdang 6:09 (0509 GMT) ako nung Zurich nungi apuso aser 8:17 ako nung Lugano tonga tamalen senzüba dang nungi minute 30 agi tekaraba atong.
Rotterdam aser Adriatic tsüngda senzütsü nukjidong tulu nung iba GBT mapa tenzükba asoshi Europe nung aliba nüburtemi kanga tenüngsanga liasü.
Swiss nunger sen indoka yangluba lungpok nung jajatsü train lenmang ya ali telung nung bomb poka aser nisungi atuba agi masü saka advance technology amshia atuba lir.
Japan nung aliba Seikan tunnel kilometer 53.9 ya alima nung lungpok nung jajaba train lenmang talangtiba liasü, saka GBT-i ibaji ajangtetogo aser Britain o France na tsüngda aliba Channel Tunnel kilometer 50.5 ya tasembuba jenjang nung lir.