Longrangty-i züluba imdangjem kaket ka saya

Mokokchung, May 25 (TYO): Morung Express osangzülur (senior journalist) Longrangty Longchar-i English nung züluba imdangjem kaket ka tenüng agi “The Storm in a bottle” sayaogo aser iba kaketji Tir Yimyim osangzülur Sashimeren Jamir-i meraketa sayatsü.

Sentong nung kaket sayatsür Sashimeren-i jembidang, kaket zülutsübaji mapa tezüba masü, aser bendanglenbo kaket zülurtemji takar küma jangratema alir, ajisaka asen limabo nüburtemi kaket azüngtsü mejangrar, ibayongji aiben liso kaket zülur aikati jangrayonga mezülur.

Kaket zülurtem timtem jenti liaka kaket asem (3) tashi zülua adoktetba asoshi paisa tezülur nem tenüngsang agütsü.

Iba kaket ajanga tongtibangsa lanurtem jenti tajangzük aser temoatsü angutsü imlar, ta ashi. Paisa kaket zülur dang ano züluba maparen maneni inyaktsü ajungshia liasü.

“Kaket zülutsü jangraba agi ni iba kaket züluogo, iba kaket ajanga tazüngertem jangratemtsü imlar”, ta tezülur Longrangty Longchar-i kaket sayaba mapang ashi. Pai iba kaket ya taküm January ita nungi zülu tenzükba tang ya menünga adoker.

Iba ‘The Storm in a bottle’ kaket nung ya asangur yilar ana libaliro indang imdangjem yimya nung zülua angutsü. Sp. Taliakum Pongener ajanga iba kaket meshiteta sarasadem. Sen 180/- agi talinertemi ABAM Book Depot, MTBA Basement, Mokokchung nung iba kaket ya angutsü.