Longrangty-i züluba ‘Seven Stones’ kaket sayaogo

Mokokchung, July 5 (TYO): Kaketzülur Sp. Longrangty Longchar-i Engraji nung züluba otsünu kaket tenüng agi ‘Seven Stones’ ta sür kaket ka Bodbarnü yangi Longkumer Kilem Mokokchung nung tobur junga sayaogo.
Iba kaket ya Jubilee Memorial School Chaplain Kr. Moarenla Chingmir-i meshiteta sarasademer sayatsü. Seven Stones kaket ya züngabo Longrangty-i tang agi kaket pezübuba zülua adoker. Iba kaket ya Dimapur nung aliba Heritage Publishing House nung menünga adok.
Iba kaket nung otsü tatsütsü tenet angutsü, item otsü ajakji yimdangjema züluba tesa. Item otsü tenet denji ano tazüngertem atema jangratemtsü osang kaji; taoba mapang pai kaket ka züluba aser nüburtemi kanga sapua azüngba “The Storm in a Bottle” otsü densema inokja lir.
Longrangty ya osang züluba wadang nung küm ter dak tema inyaka aruba nübu ka lir. Pa lanuwa nungi kaket azüngtsü aser zülutsü jangrar. Naga nunger yimdangjem kaketzülur tajung rongnung pa yaa ka asütsü ta nüburtemi züngshir.
Pai taoba mapanga “Timeless Whisper” ta sür yimdangjem otsü kaket ka züluogo aser Heritage Publishing House nung menünga adokba rongnung nüburtemi sapua azüngba kaket ka lir, ta angazüker. Aji oda, tang adokba kaket yaa tazüngertemi asoshi amajokbo masütsü, ta iba pa kaket sapua azüngertemi ashi.
Tanü Moarenla Chingmiri iba kaket sayaja jembidang, Mokokchung nung lanur sempet aketer aika lir, aji saka, ajungshir maliba ajanga aiben asenoki item sempettemji temai madoktsüteter, ta ashi.
Iba kaket ya ajanga nübur shirnok nükjidong mekai tezülen nemzüdagi, parnok asoshi teimla tasen agütsütsü aser tazüngertem lenmang aisü nung tajangzük angutsü imlar, ta laisa moaja ashi.
Nagaland nung lokti tentet aika lir, aji saka, Writers Club amala tentetba bulua mangashir, anungji, iba ama telok kar tenteta züluba wadang balala nung kati ka ajungshitepra, asen lima nungi tezülur aser tazüngertem jenti adoktsü imlar, ta laisa shisem.
Sentong nung Heritage Publishing House Chief Editor Dr. Lanusanglai kaket zülua menünga adokba indang onük kar lemsatepdang, Naga nungerji tebang agidang jembia aruba kin ka asünung, züluba maparen ya asenok asoshi inyakyim tasen ka amai lir, anungji, kaket azüngba sobaliba renlokdaktsütsü kanga nüngdaker, ta ashi.
Tanü Naga nunger kaketzülur aikati taoba mapang tangari bushiteta akabatem nungi dang teimba amshir, anungji, asen lokti indang ya tasen-tasen bushiloka zülutsüla, ta laisa ashi.
Naga nunger indang ya tangari dang teimba zülur, anungji, Naga nunger tezülurtemi tangar indang masü saka pei lokti indang zülutsütsüla, ta laisa ashi. Züluba wadang nung pei maitsü/ayak (identity)-ji kanga tongtibang lir, ta paisa shisem.
Kaket balala züluba ajanga alima aser lokti nung temelenshi adokdaktsür, anungji, züluba ya kija khuret dang masü saka ibai arok khuret lir, ta lai ashi. Tezülur tajung ka akümtsü asoshi kaket meranga azüngtsü asoshi laisa ajungshia liasü.