Longsa arogo nung revival adoker küm 50 ajungba tanelar benjong amung

Longsa, June 11 (TYO): Longsa Baptist Arogo madak Tsüngremer tanela temeshi revival milak meküploker küm 50 ajungba tenüng nung Pai inyakba mapatem bilemteta “onok tanaben asentenshijang” omen dak rangloker Longsa yimdak June 9 nungi 11 tashi tanelar benjong sentong tulu ka ayongzüka kaogo.
Sentong nung Tsüngrem osangbenerji; Rev. Dr. Imchayanger aser IEF tir Wb. Tsüknung tena liasü. Iba sentong nung Longsa sensosanger bendang balala nungi aika atenshia temoatsü ngua denogo.
Deobar temoatsü sentep nung tesayur Tsüknung-i jembidang, asentenshi (revival)-ji konang nüngsang aser nisunger purapujiba ka dang süra ibaji lisem manung ki asüba amato yipru balala arudang yakta ponger aotsü, saka Tsüngrem sentsüwangshi asoshi süra ibaji lung manung nung yangerba ki mesüka yipru balala aruaka kodanga melaotsü, ta ashi.
Paisa revival nükdang akangshitsü asoshi Lai o tesayuba kar agütsüdang, ajemalubaji revival kimung aser nükmen tongtibangtiba lir, ta ashi. “Revival tulutiba aser tajungtibaji ajemalua shirnoki Tsüngrem den jajar parnokji lir, anungji, ajemaluba nükmen dak ajemdaker noktaktsüla”, ta paisa tayongzükba ka agütsü.
Revival temaotsü indang kuli kar lemsatepdang, shirnoki pei sasa ajemalua lenmang tamajung nungi meyipdir, idangji Pai parnok temenen atoktsü aser parnok aneptsütsü, ta Laishiba nung Tsüngremi nangzükba indang pai ashi.
Tsüngremi asükümer nokdanger saka ajemalur nem taochi agütsür, ajemalur nem tepela renlokdaktsür, meshitetba tepela aittsü aser ajemalurtemi kechi meshidir Tsüngremi agütsür, ta ashi. anungji, “revival tajungtibaji ajemaluba nung amendaktsüla”, aji ta süra, “kecha agia manokshitsütettsü”, ta paisa shisem.
Ajemaluri tangar küboki air, ajemaluri mepishir, ajemaluri pei dang nungi pi tajungba ta bilemer, anungji, ajemalubaji revival nükmenji lir, ta paisa ashi. Ajemalutsübaji nisung shi kisüng agi dangbo makoktsü, ajemalutsübaji Yisui dang agütsütet, anungji, nisung shia dak Yisu tobur ajung ngudaktsütsü asoshi sayutsüngirisa ayongzüka liasü.
Longsa lima mezüng revival metsü perokba nung tongti shilem agir; asür Rev. Riküm (Mangmetong), asür Masarenla, asür Imsürenla, asür Aolemla aser taoba Longsa Baptist Arogo pastor Tsüknung nunger nem Longsa arogoi naroküm balala agüja nüngo kulikaket kaka agi senpettsü.
Sentong nung tsüngibangir (counselors)-temji; Amenla, Ayangla, Tianla, Rarenkala, Mapula, Merangba, Jongpong, Limatemsü aser Toshimanen nungertem liasü.