Longsa aser Litem tsüngda yimjung lapoka putepshi

Mokokchung, Oct 20 (TYO): October 18, 2015 nüto Longsa aser Litem yim nungi yimten aser arogo ajurutepa putepshitepba yimjung mensem tajung ka Litem yimtak takok ngua liogo ta Longsa Baptist Arogo sannüker Wb. K.Chiten ajanga sangdong ka nung metetdaktsü. Iba mensem amenba mapang akhi tejen putu nung yim ana tsüngda tongpang jazüka meraraaka, telung nung ashikülaka mangko agitepa aruba kuli sütepa tai nangzüka liasü ta paisa metetdaktsü.

Tanü putu nung iba ama azü tokshia konang nüngsang bushibaji Tsüngrem tsüngdang tai ta angateta Longsa Baptist Arogo Centenary tenüng nung yimna tsüngda Yisu maru tashi yimjung nung alitsü asoshi tai toktepa kuli zünga putepshiogo ta sannükerisa ashi.

Tongtibangsa iba yimjung mensem ajanga tarutsü lanu putu nung yimnasanger nungi walunir tajung adoka yimchi yimjung nung alitsü asoshi temoatsü agütsütepa liasü ta Sannüker Chitenisa kasa osang nungsa metetdaktsü.