Longsa Baptist Arogo centenary mung meraketa tenzükogo

ABAM Executive Secretary, Rev Dr Mar Atsongchanger (abenlen nungi pezübuba) ajanga LBA centenary nüngshilung meshiteta azüngtsür külen arogo tenzüker, yimsüsür aser lennirtem kar noksa nung angur. January 15, 2015.

Longsa, January 15: Longsa lima Khristar yimli arua arogo mesemteter küm noklangjungmung sentong “tesangwa yimli arangshidi” omen dak ajemdaker Hogulbar aonung nungi yangi Longsa yimtak meraketa tenzükogo. Iba benjong nung yimer den arogo balala nungi tejaoker meyi aika adenshia shilem agia mungdaki.

Taonung Ao Baptist Arogo Mungdang (ABAM) executive Secretary, Rev. Dr. Mar Atsongchangeri Longsa Arogo centenary nüngtem nüngshilung ka meshiteta azüngtsüogo.

Longsa lima mezüng Khrista yimsüji tongtibangsa tamangtir ana; Repjenyuba aser Sakusangba nati bener arua arogo mesemtettsü aser tanübo Longsa yimkong nung akhi tejen yimsü amanger kata mali ajak Khristan pur dang kümogo.

Iba centenary sentong nung tongti o jembir ABAM Executive Secretary, Rev Dr. Mar Atsongchangeri jembidang, jubilee amungba ya konang nüngsang ka atema masü saka ibai temoatsü agizükba den kechisarena nung asentenshiba mapang ka lir ta metetdaktsü.

    Khristan yimsü ya junger ta shitettsüsa asenoki Khristan taküm ka ama alir malir aser tarutsü lanu putu atema renema lir mali? ta paisa asüngdanga ashi. Paisa iba dak sentakba nung ashidang, Khristan yimsüji asenoki keta sena amangtsüla aser asen libaliro ajanga Khristan ka ama jungkai adoka sayutsüla.

Tanü asenoki technology tasen – tasen adokba dak dang tali rangloker, iba amai dang ora tarutsü nung alar tiai aitsü ta paisa tekümdangtsü ka ashi. Iba ama putu ka nung ya kati ka ajungshia tashi itdaktsütsüla aser asenoki amangba yimsü ya tasak amai mangmangtsüla ta paisa ajungshia liasü.

Sentong nung Lirmen Baptist Church pastor, Rev A Mar; Changki Baptist Church pastor Rev. Imna Tzudir aser Chungliyimti Village Council Chairman parnoki salem osang aben. LBA deacon S. Jongpong ajanga tarurtem pelaa agizük. LBA Associate pastor C. Imna Jamiri asürtem nem akhümtsübu aser tetushi agütsüba mapang agia liasü. Longsa Baptist Arogo, Youth Department ajanga ken aser jilushi tapu balala ia centenary benjong kanga meraketa lapoktsü.

Iba centenary nung onük jembirtemji; ABAM Executive Secretary den Tsüknung (Founder, Servanthood Bible College, Dimapur); Rev. Dr. Alemrenba (Pastor Delhi Ao Baptist Church); Rev. Dr. Peter Jamir (Missionary); L Mapula Longkumer; K Supongchiten (Pastor Longsa Baptist Church); Temjensangla NCS (SDO Civil) aser Dr. Awala Temshi (Admn. Straightway Christian Mission Centre Mokokchung) nungertem lir.

Iba sentong ya Deobar, January 17 tashi alitsü.