Longsa Baptist Arogo centenary mung temenungratsüka tembangogo

Longsa, Jan 17: Anogo asemnü January 15 nungi 17 tashi Longsa Baptist Arogo (LBA) centenary sentong “Tesangwa Yimli Arangshidi” omen nung ajemdaker yangi Longsa yimtak takok ngua mungogo.
Iba sentong nung onük jembirtemji; Rev. Dr. Mar Atsongchanger (ABAM Executive Secretary), Tsüknung (Founder, Servanthood Bible College, Dimapur); Rev. Dr. Alemrenba (Pastor Delhi Ao Baptist Church); Rev. Dr. Peter Jamir (Missionary); L Mapula Longkumer; K Supongchiten (Pastor Longsa Baptist Church); Temjensangla NCS aser Dr. Awala Temshi (Administrator Straightway Christian Mission Centre Mkg) nungertem liasü. O jembirtemi onük balala nung Tsüngrem osang tarok bener arua tesentepertem ayongzüka liasü.
Iba sentong nung arogo balala nungi tejaokertem den ano yimer aser anükapangtem meyi aika adenshia sentong tali meraketa mungogo. Sentong balala nung kentenmenü, salem osang, tayongzükba o jembir, tepela o aser shilem balala agiba ajanga tesentepertem temoatsü ngudakja liasü.
Deobarnü lanur sentep temeja sentong ka nung Temjensangla NCS-i jembidang, ‘tajungtibaji tangar kati bener arutsütsü makok; saka asenoki tajungtiba asoshi merangtsüla’ ta metetdaktsü. Laisa lanurtem dak akettsüba noklem kar lemsatepdang; ochishiba, tongmelang taküm, Tsüngrem akhümtsübuba aser tamang yur rangloksen dangi apusotsü asoshi tayongzükba agütsü.
Kasa sentong nung onük jembir Dr. Awala Temshii ‘pei luyim nung Khrista kulisüba’ nung ajemdaker jembidang, Khrista metetba den temeim aser Khristaji pei meyong südaktsütsüla ta ashi. Laisa iba dak sentakba nung ashidang, Tsüngrem o nung, pei taküm libaliro, temeim agi, tamang yur, tasüngtet noklemtem bener Khrista kuli asütsü asoshi ayongzük.
Longsa Baptist Arogo centenary nüngtem nung nüngo kaket tenüng agi “Lungchilung” ta ser ka sayaogo. Iba den centenary amungba bangzüng asem renema yuogo.
Mezüngbuba bangzüngji; Longsa Baptist Arogo centenary mung dak ajemdaker Longsa senso ajak teka amteper mission mapa tuluba inyatsü bangjemogo. Tanabuba nung; Longsa limai mezüng tamang yimsü bener arur ‘Repjenyuba aser Sakusangba’ nüngtem Commercial Complex ka küm pungu tsüngda renemtsü aser iba nungi aruba sen ajak mission mapa nung amshitsü lemtet.
Tasembuba nung LBA Centenary nüngtem aruba senpong nungi Ao Baptist Arogo Mungdang (ABAM) International Mission nem sen lakh 2 aser Longsa Arogo nem sen lakh 5 agütsür; aser tanüngba sen ajak ‘Repjenyuba aser Sakusangba memorial commercial complex’ asüba nung amshitsü telemtetba agir senshi.