Longsa lushi nung telungpur ana kaset

Brehostibar anepdang Longsa lushi nung Assam Rifles purtemi telongpur ana ket nungi anguba raraba hadir noksa nung angur. ( August 13, 2015.)

Mokokchung, August 13 (TYO): 15 August “Independence Day” sentong nung telungpuri timtem agütsütsüa akok ta osang kar lazüka 31 Assam Rifles sepaitemi mita aoba mapang Brihostibarnep Longsa (Mokokchung district) lushi kübok Tzütsüngpang ayong anasa Tamatai tzülu nung telungpur ana kasetogo.
Tekasetsang anaji NSCN (K) telok pur liasü ta osang ajanga angazüker. Iba tatalokbaji brihostibarnep 5:45 meta atalok aser telungpur ana tenüngji; Azheto (Pukhato village, Kuhuboto, Dimapur) aser kaji Khekato Chophy (Khumishi Village) liasü, ta osang ajanga metetdaktsü.
Tasüsang ana ket nungji Chinese made bomb asem (3), A.K 56 ka den injang 42 aser .22 pistol country made ka den injang tejang ka liasü, ta osang ajanga ashi.
Osang ajanga ashiba agi, tanep Assam Rifles sepaitemi mita aoba mapang telungpur ana jagi tama injang yok, anungji, AR sepaitemia meyiper kaloktsüdang telungpur anaji kaset. Ano osang balaka ajanga angazükba agi, telungpur anaji tzülu jen nung mejanga lia AR sepaitemi amakdang kaset.
Iba osang zülu tashi nung tasüsang anaji tenüng dak alaka kechi rank aser arishi küm kwi aser par tsüraburtem tenüng mejangjateti liasü.