Longsa, Merangkong, Lakhuni & Tongden semi-i iogo

Dimapur, November 12 (TYO): Taoba Nagaland Additional Development Commissioner, Dr. Temsuwati-i yashi Mongolbar nü tenzüktsüba sülen Mokokchung nung tentetba Imkongmeren Sports Complex kübok Multipurpose Hall kilung nung 2 buba W. Nokdenlemba Volleyball Trophy 2015 asayatsü tenzükogo.
Ao Kaketshir Mungdang (AKM)-i küm 3 nung ken ayonga asayaba asayamong nung telok 12 Pool 4 küma lemsar tan shilem agiba osang jangjaogo.
Pool A nung defending champion Longsa Sporting Club Mkg, Longjang Compound Young Club aser Molungyimsen Students’ Union; Pool B nung Friends United Club Chakpa, Merangkong Students’ Union aser Soyim Students’ Union; Pool C nung Lakhuni Sporting Club, Tongden Club Chungtia B aser Japukong Youth Organization aser Pool D nung Dolphin Club Meküli, AKM aser Tongden Club Chungtia A nungertem densema lir.
“Tsüngremi agütsüba sempet metettsü asoshi nisung shiai merangtsüla. Tsüngremi balaka shimtetba Ao kin nungi asayar, Dr. T. Ao-i Olympics nunga football captain ama tongti shilem agiogo. Anungji, lanurtemi state, national aser international jenjang nung takok ngua shilem agitsü alizüng ayutsü ajungshir,” ta tongti tesemdanger, Dr. Temsuwati-i ayongzük.
“Saisapongtsü shilem balala nung shilem agiba ajanga peipok mesütsüsa tanübo lenmang sadema lapoka lir. Anungji, lanurtemi sorkar mapa inyaktsü tebilemba melenshia saisapongtsü shilem nung tali temulung agütsütsüla,” ta pai ajungshi.
“Pei taküm nung kiburji na lir. Anungji, takoker mesüra tamakoker ka akümtsüji pei dak dang keta lir. Anungji, tangar dak meimlai peisasa takoker ka akümtsü asoshi nisung shia bendanga agüja inyaktsüla,” ta pai ashi.
Pei taküm tazüokba nung lia, saisapongtsü shilem balala nung takok anguba ajanga pei yim, kin aser linük nem konang aser jenjang tajung bener arutsür ta pai shisem.
Tan asayamong nung mezüngbuba aser taanabuba jenjang angur telok ana nem senpet sen 80,000 aser 50,000 agütsütsü renema lir.
Semifinal nung shilem agitsü jenjang anguba telok ana nema senpet sen 20,000 agütsütsü renemba osanga jangjaogo.
Ano, Best Spiker, Best Setter aser Player of the Tournament nunger densema individual shilem nunga senpet sen aser sempet balala agütsütsü renemogo.
Yashi asayaba asayamong tenzükba asaya nung Longsa Sporting Club teloki points 25-14, 25-9 ngua Longjang Compound Young Club madak takok angu.
Ano külen, Longsa Sporting Club-i Soyim Students’ Union telok madak 1 buba quarterfinal asaya koka semifinal nung shilem agitsü jenjang tanü Brehostibar nü nguogo.
Merangkong Students’ Union-i Molungyimsen Students’ Union, Lakhuni Sporting Club-i Dolphin Mekuli aser Tongden Club Chungtia A teloki Japukong Youth Organization madak takok ngua par telok asema semifinal nung shilem agitsü jenjang anguba osang jangjaogo.
Asüng, Hokolbar anepdang 10:00 ako nungi tenzüka Longsa Sporting Club o Lakhuni Sporting Club aser Merangkong Students’ Union o Tongden Club Chungtia A na tsüngda 1 buba aser 2 buba semifinal asayatsü renema lir.
Ano, asüng nikongtsütsü 2:00 ako nungi tenzüka semifinal asaya nung takok anguba telok ana tsüngda final asayaba sülen sempet o senpet agütsüba aser asayamong shibangba sentong agitsü sentong renemogo.
Nagaland MLA, Imkong L Imchen asayamong shibangba sentong nung tongti tesemdanger alitsü.