Longtarai Valley nung arishiküm 45 tain school tesayur ka tepsetba ajanga tensa mejungi lir

Agartala, July 21 (Agencies): IPFT pur longkak aitba anenba sülen maneni North Tripura Longtarai Valley nung July 19 aonung CPI-M aser BJP pusemertem mangatettep adoka arishi küm 45 tain school tesayur Babul Debnath tepsetba ajanga tensa kanga mejungi kümer lir.
CPI-M puri anüdok nungi anülu tashi iba anema tanü longkak aitba sentong ka ayongzüka kaogo. BJP pur state nung sorkar menden kümtetnüba ajanga truba küm election madong tsüngda parnok-i lokti nung tebendang adokdaktsütsü asoshi meranger aser CPI-M pur den rara menatsü meranger, ta parnoki ashi.
“BJP puri yamala azüdokshiba maparen inyakba onoki magizüktsü. Tripura mapang talangka telungpur dak sendakba nung azüdokshia arur tang yimjung nung lir. Iba mepetmesü ajanga Tripura mapang talangka terenlok makai aruogo. Tanü Tripura kechi jenjang nung lir iba ya CPI-M pur ajanga lir aser tang BJP puri iba ya raksatsütsü meranger,” ta CPI-M state secretary Bijan Dhar-i ashi.
Kasa mapang nung BJP puri ashiba agi, yirurtem parnok pezüprongla par telok nung lir aser aji CPI-M puri azükba lir. Tasüsang Babul Majumdar ya Chailengta nung parnok amaker rongnung densema liasü. Parnoki BJP pur Nishi Chakma kecha kuli makai kanga mejungi azük aser Babul ya lokti-i amakba mapang tepset, ta BJP tir Biplab Kumar Deb-i ashi.
Paisa ashiba agi, CPI-M pusemer Raju Mani Chakma aser BJP pusemer Upendra Reang na IPTF pur dak sendakba nung tebilemba balala bener sensaksemba mapang mangatettep adok aser iba sülen tangar aika iba mepetmesü nung densema lendong tuluba aküm. Babul idakjisa asü aser BJP nung züngsem Nishi Chakma yashi Agartala Govt Medical College nung tekolak kanga mejungi yiruba ajanga süogo.