Lotha Hoho-i onük 3 bangjemtep

Dimapur, August 24 (TYO) : India sorkar aser NSCN (IM) tsüngda tawa tenangzüktep agiba onük atema August 24, 2015 nü Lotha Hoho rongdak senden ka ayongzüka agi.

Naga nunger pei sasa telemtetba agia litettsü atema raraba nung iba tenangzükba ya otsüsütsü mapa ka lir aser iba asoshi NSCN (IM) lennirtem aser India Prime Minister, Narendra Modi dang pelar ta tanü senden nung bangjemtep, ta LH Chairman, Mhao Humtsoe aser General Secretary, Mhondamo Ovung nati sangdong ka nung metetdaktsü.

Senden nung Lotha Hoho-i onük asem bangjemtep aser item onük rongnung mezüngbubaji, tetsü-tebou mapang nungi Naga nungeri alumang aser rongsen atema temzüng-ozüng amshia aruba sobaliba nung ajemdaker telemtetba agitsü atema inyakyim latettsü. Tanabuba onükji, yimtenren telemtetba agiba nung Naga nunger lushi ajak densemtsüla aser iba onük ana nungi Lotha nugertem masetshitsü, ta Lotha Hoho sangdong nung shia lir.

Lotha Hoho-i bangjemtepba onük tasembubaji, Naga nunger yimten tebilemtsü olemtep indang inyakyim aser iba dak sendakba onüktemji yimjak nung Naga nunger ajak nem metetdaktsütsü indang lir.

India sorkar dang Nagaland nungi Disturb Area Act agientsü atema takhangba agütsür kechiyong iba ajanga tawa Yimjung Tenangzüktep mezüngmeshir, ta Lotha Hoho-isa sangdong nung metetdaktsü.