Lotha nungertemi Tokhu Emong kanga meraketa amung

Dimapur, November 7 (TYO) : Honibarnü Nagaland kübok tesem balala nung Lotha nungertemi Tokhu Emong benjung kanga longsoa mungogo.
Dimapur nung Oriental colony nung alir Lotha nungertemi state stadium nung ‘Tokhü Emong’ amung aser iba sentong nung tongti o jembirji Joint director Land Resources, Renben Lotha liasü.
Lotha nunger nem alima tobur tajung moaja lir aser Pangti nung Molulem (Amur Falcon) ozü anenzükba ajanga tanü alima ajungai asenok meteta kümogo, ta tanü Renben-i ashi.
Tanü-asüng “Technology, Entertainment, Design” putu nung alidang nisung ka tanela aser shisatsü alitsüla aser lokti nung tesentaktep tajung alitsüla, ta paisa shisem.
“Item ajakji lokti ajangzüktsü asoshi lir. Anungji asenok tsüngda aser tangar den temeim, mulungsotep aser tesentaktep tajung alitsü nüngdaker. Kin sasep nung telemsa aliba agientsüla aser asen tetsü-tebou mapang Lotha kin kanga junga aliba ama tanüa asenoki alitsü merangtsüla” ta Renben Lotha-isa ayongzük.
Iba sentong nung Lotha Oriental Emathae Okho, Sunday School KLO sector tanurtem o Yanpothung nungertem ken ajanga shilem agi aser Rev. R. P. Murry-i temoatsü meshia sarasadem.
Diphupar nunga Lotha nungertemi Agri Expo site nung sentong ka ayongzüka agi aser iba sentong nung tongti tesemdangerji Ex. Minister T.A.Ngullie aser tetushi süa jaokerji Ex. State chaplain Rev. Yankey Patton na liasü.
Tokhu Emong anogo ya asen tetsü-tebou nungertem bilemtetba anogo ka lir aser asenoki otsüla-oboula nunger mapang tatok agütsütepba, telongjem aliba aser meranga inyakba tangatetba bener arua amshitsüla. Iba anogo ya asentenshitsü aser tatok agütsüteptsü anogo ka lir, ta T.A. Ngullie-i ayongzük.
Sentong nung Rev. Yankey Patton-i temoatsü meshia sarasadem, Organizing committee chairman Khumkothung Ngullie-i Tokhu Emong teratet metetdaktsü aser Patkai Christian College Dimapur nungi Lotha kaketshirtemi ken aten.
Mokokchung nunga Lotha nungertemi 48 buba Tokhu Emong benjung ayongzükba amung. Iba sentong ya Multi-Purpose Cultural Complex, Ungma, Mokokchung nung agi.
Benjung nung tetushi süa jaokerji Renbomo Ezung, SDO (C) Mangkolemba liasü aser Dr. Motsuthong E. Patton, M.S IMDH-i tajungshi o jembi. Iba sentong nung mendenji Addl. S.P Mokokchung T. Yanrenthung Ngullie liasü.