Lotus naro o antepong na sangteper

India nung Narendra Modii aniba National Democratic Alliance sorkar küm ana ajungba mong tenüng nung sentong tajung ka yakanü Kohima nunga ayongzüka amongdang Lotus naro amshiba BJP teloki antepong telok NPF asangba aser antepongia lotus naro topur ajung asangbaji tim dang sangtepogo. Tapu tapu jembiyonga tanü tashibo India nung National party ka den longjemer moura center dak nendaka aliba state  Nagaland amabo timtem aika ajurur. Ibayongji, aiben center nung koba teloki yimsü südir iba telok denji adentsüsa akümer. Ano, tang balaka NPF telok yabo Nagaland nung Congress telok laodaktsüba telok lir, anungji BJP den külem ser aotsübaji parnok mapa jagi adoka adoker. Aji oda, tang center nung BJP teloki yimsü asütsüsa mapang arubaji Nagaland nung NPF telok asoshisa temoatsü tuluka lir. Iba temoatsü nung Nagaland nung BJP telok NPF teloki aniba sorkar nung adener aser oagi center nung BJP teloki aniba sorkar nung NPF adener. Atangji, Lok sabha nung Nagaland nungi MP ka NPF teloki shimteter yoksangbo, parnoki NPF telok nungi anenja lir, anungji NPF aser BJP tekok sangtepaka pa olabo mangashir. Ibaji Naga nunger asoshi aser ano talisa pa ( Lok sabha MP) asoshi takoksa tulu lir. Tang center nung BJP teloki aniba sorkar küm ana ajungba sentong nung NPF teloki aniba sorkar nung chief minister, T.R.Zeliangi Narendra Modii aniba sorkar mapang linük nung kechisarina nüngdak oset ajak India nung dang yanglutsü aser India nunger ajak dang mapa inyak (skill) sayutsü sentongtem ama apiteta inyakba asoshi tenüngsang agütsü. Ano, BJP teloki aniba center sorkar asoshi nüngsang kaji taoba küm ana yimsüsüa aruba mapang parnok kilonsertem rongnung ochimashi mapa inyakba osang shinga nungia mangashi aser shingaia ken o kecha magütsü. Tetezü, taoba Congress mapang dang nungibo BJP teloki yimsü asüba mapang ya tajungba dang masü saka ochitashiba yimsü asür ta parnoki nübortem nem angatetdaktsüner. Atangji, aji shitak, saka tangang yimsü asü tenzüker asünungji, tang tangbo BJP teloki aniba sorkar nung ochimashi kenyongi mali ta ashitsübaji yaktara asütsü. Ano, külen BJP teloki Nagaland nung NPF teloki aniba DAN sorkari nübortem asoshi mapa tajung inyakba asoshi tenüngsang agütsüba angashiogo. Ajisüaka, an tepong o lotus naro na azükdak tenüngsangtepa kazüdang ali nung alir Naga nungertembo anak auyi agi tejaka jungjunga mereprangtettsüsa pongpanger timtemba angutsü. Atangji, tenüngsang agütsüba anogomong sentong asüba agi tenüng sangteper dang ashi, shitakba jembidi süra BJP telokia NPF dang mepelaba aika alitsüa akok aser NPF telokia center nung BJP teloki aniba sorkar dang mepelai alitsüa akok. Koba südir süang, pelatsü anogo ka aser jashitsü anogo ka, anungji tepela dang koma pelatsü aser jashidang kona jashitsü, aji metetra taküm nung takok angutsü. Aji oda, tang BJP o NPF telok na sangtepba nung tagitsü kaji center nung BJP teloki taoba küm ana ochimashi inyakba otsü kecha mali ta asubaji asutsu. Teinyaktetba rongnung ajak dang aji tulutiba asütsü. Iba kasaji Nagaland nunga NPF teloki aniba sorkar nung yimsüsürtemi  ochishia inyaka lir mali (?) ta asüba tasüngdangbaji asütsü. Iba tasüngdangbaji langzütsü merangdang, Nagaland nung tang yimsü tesüdak purtemi abenba department teimbaka nung ochimashi ken o ka mesüra kabosa tepdaka lir, anungji Nagaland nungbo center nung amaji ochimashi mapa kecha meinyak tabo meshitettsü. Ano, ajak asoshi tongtibang kaji, center nung yimsü asüba BJP telok yabo Khristan tesayuba nung amendaker amangba purtem masü saka Hindu yimsü nung tera yanga bushia meteter tashitemetettertem lir. Aji oda, Hindu nungertemibo ochishia yimsü asür saka Khristantemiang Hindu nunger tsüngdang tiyazü jembia meshizüka bener aruba sen ochishia mamshitetter ta süra tanü yamai sangtepyonga asüng parnoki  asenok mezüngmeshitsü, kechiyong tiyazü jembir aser ochimashirbo shingaia aküm metsübur aser mezüngmeshir. Iba ama tia ka nung Lotus naroi antepong topur ajungba asangyonga, ashiko temulungjang nungbo antepong dak tebu maliba-ang menüja bilema alitsüa akok. Aji oda, sangtepba agia masü aser tiyazü jembiba agia masü saka ochishia lira, Tsüngrem yangji adentsü.