Love Sonia film Rongjui 14 nü sayatsü

Luroi/ August 17 (Agencies): Ozüng alema tanur shibelenba otsütem nung ajemdaker yangluba Love Sonia film ya taküm küm Rongjui/September 14, 2018 nü sayatsü ternemba lir. Tabrez Noorani indang Love Sonia otsü angadangra, India, Hong Kong aser Los Angeles linük tem nung ozüng alema shibelenba maparen nungi arishi küm 17 tetsür kati la aianu kümzütsü atema tetsübu tensa den timtem ajangshiba indang asütsü.
Iba film ajanga alima tesem balala nung ozüng alema shibelenba maparen tem indang tali jangjaa sayuba ajanga alima ajunga nungi nübur telangzüba tajung ngua liasü. Tang tagidak aliba Indian Film Festival of Melbourne 2018 sentong nung Love Sonia film-i Indie Film Award agizük.
Love Sonia film nung Freida Pinto, Manoj Bajpayee, Richa Chadha, Rajkummar Rao, Sai Tamhankar, Adil Hussain aser Mark Duplass nunger den külemi Mrunal Thakur-i tongti shilem agir. Love Sonia film ya Mrunal indang mezüngbuba film asütsü. Kasa film nung nüngtugu Hollywood actress Demi Moore-i shilem agiba angutsü.
“London aser Melbourne nung iba film ajanga telangzüba tajung ngur sülen tang iba film India nung sayatsü atema ni kanga jangrar. Film nung cast tem den külemi team puri pei dak akaba sempet yari tajungtiba nung shilem agia film takok ngua yanglutetbaji kü atema temoatsü ka ama lir,” ta Noorani-i ashi.