Love Sound Movement-i Oct. 11 nü tekülem sentong ayonger

Dimapur, October 09 (TYO): October 11, 2020 nikongdang 4:00 ako nungi Love Sound Movement-i Supermarket area, Dimapur nung tekülem sentong ka ayongzüker, anungji iba sentong nung ajak adentsü atema pelashishia jaoker, ta Hokolbarnü Core Team-i sangdong ka ajanga metetdaktsü.
Asentenshi milak jangrutsü nükjidong nung Tali Angh aser Jungtina Jamir nati mangdang yur Love Sound Movement ya tenzüka liasü.
“Nüburtemi Tsüngrem dak tamang akaba aser Tsüngrem ola angaba den külemi chichia tatok nangzükba aser amangbapurtem tsüngda telongjem aliba ajanga chichiba taneptsüba aser temelenshi adoker. Anungji Arogotem aser amangbapur ajak dang asentenshi milak jangrutsü aser longjemtsü tayongzükba agütsütsü atema iba movement ya tenzük, koba ajanga asenoki temoatsü anguba dang masü saka Khristantem ama linüktem atema asenok temoatsübatem asütsü, aser iba ya asenoki taküm aliba Tsüngrem chichia külemba ajanga dang ataloktsü,” ta parnokisa metetdaktsü.
“Tsüngremi tuyuba ama August 4 nungi tenzüka tesüiba ita ana tashi onoki Dimapur kübok tesem balala nung lenmang nung tekülem sentong agia arur. Item sentong agitsü atema onoki district administration dang temelaba agiogo,” ta parnoki metetdaktsü.
“Tan iba sentong nung chichia tanela aser ochiba nung asenoki tekülem agitettsü. Iba mapang ya longjemtsü atema mapang ka lir. Meimchir kijaibo makoktsü saka Tsüngremibo akoktsü. Tang mapang ya alima dang Tsüngrem temeim sangdongtsü mapang lir, anungji amangbapur ajak dang iba sentong nung adentsü ayongzüker. Onoki YouTube (Tali Angh Music) nunga iba sentong agiba live yoktsü. Iba dak alia ajaki Covid-19 dak sendakba tekümdangtsü ajak benshitsü mepishir,” ta Core Team-isa metetdaktsü.