Lower Jail Colony Panchayat silver jubilee amung

Lower Jail Colony Panchayat jubilee nüngshilung sayatsüba sülen Minister Dr. Nicky, pa kinungtsü aser LJCP züngsemtem külemi agiba noksa angur.

Kohima, November 12 (TYO) : Honibarnü Lower Jail Colony Panchayat (LJCP) Kohima küm 25 ajungba jubilee amung.
Iba sentong nung tongti tesemdangerji Environment, Forest & Climate Change Minister, Dr. Neikiesalie Nicky Kire liasü.
Panchayat Hall nung agiba sentong nung Dr. Nicky-i kiyong nung alirtem dang küm 25 ajungba benjung amungdang, süia aruba kümtem meyipa reprangshitsü atema tayongzükba agütsü.
Paisa kiyong nung alirtem dang kibong ka ama alitsü aser nüngdakba mapang yariteptsü aser colony lennirtem aser tanüngbapurtem tsüngda tesentaktep tajung ayutsü atema ayongzük.
Lower Jail colony panchayat mezüngbuba secretary, Medochol Sothu-i kiyong tentetba aser panchayat tenzükba indang osang metetdaktsü.
Colony nung ozüng alema mapa inyakba maparen anema noktaktsü atema June 1991 nung rongdak senden ka nung panchayat tentettsü telemtetba agi, ta Medochol-isa metetdaktsü.
Sentong nung LJCP Chairman, Chayazo Kehie-i tesentepertem pela agizüka jembidang, state nung telongjem, amalitep aser tangatettep aliba model colony ka südaktsütsü atema parnoki merangtsü ta ashi.
Sentong nung mendenji LJCP Secretary, Adi Sothu liasü, LJCP Advisor, Rev. Dr. Tsanso-i temoatsü meshia sarasadem, LJC Women Organization-i jubilee ken aten, LJC Youth Organization-i ken ka aten aser organizing committee convenor, Visheho Zhimomi-i anküp tepela o jembi.