Loyem Memorial asayamung tanü nungi tenzükogo

Dimapur, Mongputeni/October 10 (TYO): 26buba Loyem memorial Trophy mezüngbuba asaya Sangzi FC aser Pisgah United FC na asayaa liasü. Asayamung mezüngbuba goal Johnny-i minute 9buba nung idaktsü. Iba asaya ya defending champion Sangzi FC-i goal 4-1 agi ayong ayonga kokogo. Asaya nung mezüngbuba goal idaktsüba sülen Johnny-i maneni minute 53buba nung goal ka idakja liasü. Tanungba goal ana ya Benjamin aser Likokmong-i idaktsü. Pisgah United pur atema goal ka ya Menya-i idaktsü.
Asayamung lapokba sentong nung Alemtemshi IAS Rtd, CEO, Investment and Development Authority of Nagaland tetushi tesemdanger asü. O jembiba mapang pa küm 48 tejakdang GHSS Tuensang nung azüngba bilemtetshia jembi. Loyem Memorial Ground jenjang tajungba küma yanglushir aliba ngua pai CCSU aser asayamung ayongertem tenüng asang.
“CCSU aser Organising Committee-i sorkar teyari kecha medeni sen lakh 23 dak tema bendentetba ya takok tulu ka lir,” ta pai ashi.
Pa o tatemi iba ground ya standard stadium ka küma yanglutsü asoshi senotsü teyari bushitsütsü atema tenangzükba agütsü.
Asayamung lapokba sentong ya Nayang lenisüba kübok aka aser Executive Secretary CBLT, Rev. Achu Chang-i temoatsü meshia sarasademer tenzük. Lokti pelaa agizükba o jembidang Loyem Memorial trophy, Convenor P. Ngamen-i iba asayamung takok angutsü asoshi teyari balala agütsüba kija aser lokti tenüng asang.
1992 küm tenzükba sülen 26buba Loyem Memorial Trophy ya taküm mezüngbuba Loyem Memorial Ground nung asayatsü. Ita peyong asayatsü aliba asayamung ya Mongputeni/Oct 10 nü nungi tenzükogo.
Iba asayamung nung telok 16-i shilem agitsü.
Takoker nem senpet yamai agütsütsü:
Champion – sen 2, 10,000, trophy, certificates aser medals.
Runners up- sen 1, 10,000, certificates aser medals.
Semi Final nung tamakok angurnem sen 25,000.
Golden Ball – sen 10,000
Golden Boot – sen 10,000
Golden Glove – sen 10,000
Most Promising Team – sen 15,000