LPG dealer 10,000 lapoksemtsü nükjidong lir : Pradhan

New Delhi, January 15 (Agencies): Linük sorkari tang aliba LPG dealer 16,000 dak alia ano 2016 küm dealer tasen 10,000 lapoksemtsü nükjidong lir.
Pradhan-i, 2016 küm ya ‘Year of LPG Consumers’ asütsü aser iba sentong ya 2018 küm tashi nungbo sorochiok dang amshiba gas temerük linük nung aliba nüburtem ajak ket nung alitsü asoshi mezüng mera lir, ta January 01 nü metetdaktsüogo.
“Onoki taküm 2016 küm LPG retail dealer tasen 10,000 lapoktsü sentong yangluogo,” ta New Delhi nung, January 21 aser 22 nü amungtsü aliba, pezübuba India-Africa Hydrocarbons senden atema osangbenertem senden ka amenba mapang Oil Minister Dharmendra Pradhan-i ashi.
“Totzü shishilembaba mapang inyakertemi iba sentong asoshi majangbo remogo. LPG retail dealerships tasen lapoktsü asoshi MP aser state tem nungi tebilembatem aika arudangi,” ta Pradhan-i ashi.
Tang asen linük nung LPG amshir nisung crore 27 lir aser iba rongnungi noklang nung shilem 16.5 bo LPG teti amshirtem lir.
Totzü shishilembaba mapang inyakertemi linük nung LPG amshir noklang nung shilem 60 tashi amshia lir.
State tenet nungi district 33 nung kerosene atema ‘Direct Benefit Transfer scheme’ ka April 01, 2016 nü nungi lapoktsü aliba indang jembidang pai, “Onoki tekaratiba nung item state tem jatepa senden ka mena iba inyakyim telung tonga ia lemsateptsü aser kasa sentong nung anünga aliba state tem nungia tan mezüngsüa tenzükba sentong nung shilem agitsü ni tamang akar,” ta pai ashi.
Pai, tang aliba Compressed Natural Gas (CNG) indang outlet 350 dak alia ano tarüba ita asem tsüngda 104 lapoksemtsütsü, ta shisem.
4buba India-Africa Hydrocarbons Conference indang jembidang, pai, iba senden nung linük 17-i shilem agidar aser item linük rongnung 10-ibo senden nung adentsü asoshi linük kilonsertem yoker, ta ashi.