LS aser by-elections atema candidate 9-i tenüng agütsü

Kohima, March 25 (TYO): Nagaland nung April 11 elections atema candidate ajak agi parnok 9-i tenüng agütsüogo.
Candidate tem rongnungi Lok Sabha election atema pezü aser 26 Aonglenden Assembly Constituency atema 5 lir.
Hombar nikongtsütsü 3:00 ako nung menden anaprong atema nominations mapang tembang.
Lok Sabha election atema tatembangba nomination anogo nung candidate ana- National People’s Party (NPP) nungi Hayithung Tungoe aser Indian Christian Secular Party (ICSP) nungi Dr. M. M Thromwa Konyak nati tenüng agütsü.
Tanü Commissioner indang conference hall nung Commissioner & Returning Officer, Nagaland, M. Patton-i ADC (HQ) & ARO, Limanenla teyari agia candidate temi agütsüba kulikakettem reprang. Iba mapang General Observer, Ravi Jha, IAS dena liasü.
Taoba Hokolbarnü People’s Democratic Alliance (PDA) indang külem candidate Tokheho Yepthomi aser taoba Chief Minister K L Chishi nati tenüng agütsü.
Ajisüaka, State Assembly nung opposition Naga People’s Front (NPF)-i Parliamentary elections nung metokteptsü lemtet.
“Party-i Parliamentary elections nung metoktepba atema kuliji metetdaktsütsü saka tongtipangbaji onoki Assembly bye-election nung temulung agütsünür” ta NPF otongdar Achumbemo Kikon-i ashi.
Ano külen, Indian Christian Secular Party (ICSP)-i tang mezüng atema Nagaland nung election nung tokteper.
Indian Christian Secular Party (ICSP) ya Hyderabad nung amenoker tentetba party ka lir.
Iba party nung President ji M. Udaia Kumar lir. Pa ya SHARE Microfin Limited Founder aser Managing Director lir.
NPP-ia tang mezüng atema Nagaland parliamentary election nung tokteper. 2018 küm parnoki mezüng atema state assembly elections nung toktep aser menden 2 nung takok angu.
Ajisüaka, March 20, 2019 nü NPP MLA tem- L Khumo aser Imnatiba nati party toktsür NDPP nung aden.
Nagaland PDA sorkar nung NPP dena lir saka party-i elections anaprong nung candidate toktepdaktsütsü telemtetba agiba anema party toktsür ta Khumo o Imnatiba nati ashi.
26-Aonglenden menden atema candidate pungui SDO(C) Mokokchung aser Assistant Returning Officer, Abhinav Shivam ket nung nomination papers agütsüogo.
Yaküm September ita NDPP MLA asür Imtikumzuk ajungbena asüba ajanga iba bye-election agitsüsa akümer.
Hokolbarnü PDA külem candidate Sharingain Longkumer-i nomination asü aser tanü Alemjongshi Longkumer (Congress), Toshipokba Longkumer (NPF) aser O. Tinujungshi Longkumer (NPP) nungertemi tenüng agütsüogo, ta Deputy Commissioner aser District Election officer Rajesh Soundararajan, IAS-i ashi.
Congress-isa substitute candidate ka indang kulikakettem agütsüba ajanga nisung pungui bye-elections atema tenüng agüja lir, ta Rajesh Soundararajan-isa ashi.
Kulikatettemji asüng reprangtsü aser March 28, 2019 tashi nung tenüng meyipa agitsü akok.
April 11,2019 anepdang 7:00 ako nungi nikongtsütsü 4:00 ako tashi polling agitsü.