LS by-election: NPF-i C Apok Jamir aser NDPP-i Tokheho Yepthomi shim

Kohima, Monupii (May) 8 (TYO): Nagaland Lok Sabha menden atema by-election nung toktepernürtemi tenüng agütsütsü atema anogo ana dang anünga lia, Opposition NPF-i C Apok Jamir toktepdaktsütsü shimogo saka Nationalist Democratic Progressive Party (NDPP)-i aniba People’s Democratic Alliance nungi conensus candidate ano meshimtet lir.
NPF Party osang ka ajanga shiba agi, tanü NPF central executive council-i Monupii (May) 28, 2018 nü Lok Sabha by-election nung taoba MP aser MLA, C Apok Jamir toktepdaktsütsü atema mulunga agizük.
Ano külen, NDPP, BJP, NPP aser Independent adenba PDA sorkari asüng ang parnok ajak tenüng nung candidate ka dang yoktsü atema olemteptsü ta osang angazüker.
Asüngnep 11:00 ako nung PDA pur CMO nung adenshitsü aser idangji by-election atema candidate ka dang yoktsü asü mesüra balala tokteptsü ta asüba telemtetba ka agitsü, ta NDPP secretary general Abu Metha-i ashi.
Ajisüaka, tanü nikongdang NDPP senden ka nung PDA tenüng nungi taoba minister Tokheho Yepthomi toktepdaktsütsü atema telemtetba agiogo ta NDPP osang kar ajanga angazüker.
Lok Sabha by-election atema nomination agütsüba tatembang anogoji May 10 lir.
Taoba Lok Sabha MP Neiphiu Rio-i Tsüklai (February) 17 nü Assembly election nung tokteptsü atema menden toktsüba ajanga by-election agitsüsa akümer.
Rio-i NDPP ticket nungi toktep aser 11-Northern Angami-II Assembly menden nungi pa den tetokteper shinga melii takok angu. Pai kümsük pezübenbuba atema Chief Minister inyaker.
Lok Sabha by-election atema returning officer Commissioner Nagaland, M Patton-i tanü osangbener den jembidang, tanü official timing tembang tashi nung nisung shingaia tenüng magütsü, ta ashi.
Monupii (May) 3, 2018 nung Lok Sabha by-election atema nomination agütsütsü mapang lapoktsü.
Political party temi tenüng agütsütsü atema anogo ananü anünga lir aser RO ka ama par ketdangser aser staff temi election timi agitsü atema renema lir, ta M Patton-isa metetdaktsü.