LS by-election result ajanga PDA sorkar jenjang mejungi akümba sayur;

Vigilance Commissioner shimba meyipa agitsü akhanger: NPF

Kohima, Aami (June) 2 (TYO): Nagaland nung opposition Naga People’s Front (NPF)-i Lok Sabha by-election nung tamakok anguba agizüker saka iba result ajanga People’s Democratic Alliance (PDA) sorkar jenjang ajema akümba sayur ta metetdaktsü.
Tsüklai (February) ita State Assembly election nung NPF-i votes 3,89,912 angu saka tan Lok Sabha by-election nung NPF-i votes 4,20,459 angu aser ibai votes 30,547 teimba lir. Iba ajanga Naga nungertemi NPF meimba sayur, ta tanü nikongtsütsü NPF central office nung osangbener den jembidang NPF otongdar Achumbemo Kikon-i ashi.
Nagaland state nung vote agütsürtemi NPF yariba atema pelar. Onoki by-election nung tamakok angu aser onoki ibaji agizüker. NPF candidate C Apok Jamir yariba non-NDPP pusemertem, political party tem, telok aser kija ajak dang kanga pelar, ta paisa ashi.
Nagaland nung Lok Sabha election agia arudang vote lakh 4 dak temaisa takok ngua aru saka taküm NPF-i lakh ka dak temai dang ngudaktsüba ajanga otsü tasen ka yangluogo, ta Kikon-isa shisem.
“Assembly election nung nisung aika adenshia vote agütsüra vote agütsür 84.27% liasü saka by-election nung vote agütsür kangabo maliasü saka vote agütsür 86.73% liasü. Iba ya NDPP candidate yarirtemi proxy voting asüba ajanga lir aser parnoki booth tem makdokba kuli NPF ket nung lir” ta paisa metetdaktsü.
State sorkari retired principal district & session judge aser NDPP ex-candidate Mayang Lima state Vigilance Commissioner shimba aitsür ta NPF otongdarisa ashi.
Vigilance Commissioner ya political post ka masü saka statutory post ka ta PDA sorkari metettsüla aser iba mapa atema Opposition lennir den asüngdangyar ang shimtsüla, ta Kikon-isa shisem.
“PDA sorkari taküm state general election nung tamakok anguba candidate ka shimbaji tim masü aser pa shimba meyipa agitsüla” ta paisa takhangba agütsü.
Vigilance commissioner shimtsü atema opposition lennir den asüngdangteptsüla saka kecha masüngdangtepba atema sasar. Sorkari opposition lennirtem akhümtsübutsüla kechiyong assembly nung züngsem 25 lir, ta Kikon-isa metetdaktsü.
Meriema nung High Court building tasen yangluba atema High Court-i CBI nem bushisüngdang asütsü tetuyuba agütsüogo. HC nung Mayang Lima ya registrar inyaka liasü aser iba ochimashi ken o nung pai shilem agia lir asü maliar mezüng reprangdanger ang shimtsüla, ta paisa ashi.
Governor-i Mayang Lima Vigilance Commissioner shimtsü indang file agizükba atema süngmanger aser iba ya ajanga pai Naga nunger shisashirtem mezüngmeshiogo, ta Kikon-isa shisem.
NPF ya Naga nunger maitsü aser temetentem kümzüka ayutsü atema tentetba lir aser Centre-i citizenship amendment bill benokba magizüker. Iba bill ya agizükra Centre sorkari North East aser Nagaland-i ozüng alema arurtem yoktsü, anungji NPF-i iba bill magizüker, ta paisa metetdaktsü.