LS election atema Congress aser NPF senden amen ; NPF-i MLA 6 nem show cause notice agütsü

Kohima, March 26 (TYO): Nagaland nungi Lok Sabha menden ka atema opposition telok Naga People’s Front (NPF)-i metokteptsü lemtetba sülen tanü parnoki Congress den senden ka menogo.
NPF-i iba telemtetba agiba ya BJP adenba People’s Democratic Alliance (PDA) masü saka tanga secular party ka posemtsü atema lir, ta NPF otongdar Achumbemo Kikon-i ashi.
Party secretary general aser Rajya Sabha MP, K G Kenye lenisüba kübok NPF Coordination Committee-i tanü Nagaland Pradesh Congress Committee (NPPC) lennirtem den ajurutep. Iba mapang working president Apong Pongener aser pa dena liasü, ta Achumbemo-i ashi.
Tanü telemtetba agiba osangji Kohima nung March 30 nü NPF senden amendang Party president Dr Shürhozelie Liezietsu-i metetdaktsütsü ta paisa shisem.
Külen, NPCC working president Khriedi Theünuo-ia ashiba agi senden junga menogo aser tatembangba osang ano mesangdong lir.
Senden nung NPCC president K Therie den LS election atema INC candidate K L Chishi, NPCC general secretary G K Zhimomi aser pa aden, ta Theünuo-isa shisem.
NPF MLA temi Lok Sabha election nung Nationalist Democratic Progressive Party (NDPP) candidate Tokheho Yepthomi posemtsü ta metetdaktsüba atema MLA 6 nem show cause notice agütsü.
NPF Disciplinary Action Committee convener Blaise Iheilung aser secretary Tsumongo Ovung nati show cause notice agütsü.
Yasüng sangdong ka nung NPF MLA 7-i NDPP candidate posemtsü ta metetdaktsü. Ajisüaka, NPF-i MLA C L John dak medeni tanüngba MLA 6 nem ang show cause notice ji agütsü.
Iba maparen nung MLA John-i shilem agiba kuli kecha mali aser iba jagi pa nem notice kecha magütsü, ta otongdar Achumbemo-i ashi.
Social media aser osangkakettem nung porkshiba osang aser noksa nung MLA John indang sign maliasü aser parnok 6-i dang sign asüba den Chief Minister Neiphiu Rio aser NDPP president Chingwang Konyak den külemi noksa tangoka lir, ta paisa metetdaktsü.
MLA 6 ji Kejong Chang, NPF MLA, 54 Tuensang Sadar II A/C; EE Pangteang, MLA, 48 Moka A/C; Eshak Konyak, MLA, 47 Aboi A/C; BS Nganlang, MLA, 49 Tamlu A/C; N Thongwang Konyak, MLA, 46 Mon Town A/C; aser Toyang Chang, MLA, 53 Tuensang Sadar I A/C nungertem lir.
PDA Candidate posemtsü ta NPF MLA temi sangdongbaji party alema inyakba mapa ka lir anungji telangzüba agüjang ta NPF Disciplinary Action Committee (DAC)-i metetdaktsü.
MLA temji taoba elections nung Naga People’s Front ticket nungi takok angu aser Party Ticket agizükdang NPF Constitution sülen anidaktsü aser tashi angatsü tezüngzüktep agi. Anungji parnoki tang inyakba mapaji party tangatetba alema lir, ta Disciplinary Action Committee (DAC)-i ashi.