LS election nung BJP-i terenlok onük nung ajemdaker tokteptsü: Rajnath

Kanpur, Rongchii/April 27 (Agencies): Tanü Union home minister, Rajnath Singh-i, 2019 küm Lok Sabha election nung BJP-i terenlok aser junga yimsüsüba onük nung ajemdaker tokteptsü, ta metetdaktsü.
“2019 küm Lok Sabha election nung ozü party atema tongtibangtiba onük anaji terenlok aser junga yimsüsüba asutsü,” ta pai metetdaktsü
Tanü Kanpur kübok Harihar Dham nung osangbenetem den jembiba mapang nung tasüngdangba ka langzüdang Rajnath-i, Kairana Lok Sabha menden bye election nung BJP-i takok angutsü, ta ashi.
“Onoki tamang kanga akar; onoki Kairana by-election nung takok angutsü,” ta pai ashi.
Iba menden atema bye election Monupii (May) 28, 2018 nü agitsü. Taküm Tsüklai (February) ita nung BJP lenir tain, Hukum Singh ajungbena asüba ajanga iba menden tazüng akum aser tang election agitsüsa akumer.
Ato kilonser, Narendra Modi-i China linük anogo ananü semdangba dak sendakba nung Singh-i, India-i China den dang masü saka kidanger linük ajak den tesendaktep tajung yuner, ta ashi.