LS election nung NPF-i Congress candidate yaritsü

Dimapur, March 30 (TYO): Taruba Lok Sabha election nung Naga People’s Front (NPF)-i Congress candidate KL Chishi posema yaritsü telemtetba agiogo.
Taruba LS elections atema dang secular forces candidate (Congress) külemi yaritsü atema NPF-i mulunga agizük ta NPF President, Dr. Shürhozelie Liezietsu-i ashi.
Honibarnü Central Office nung CoB, Divisions, CEC, Frontals aser MLAs den senden amendang Dr. Shürhozelie-i iba osang metetdaktsü.
Citizenship Amendment Bill (2016) ajanga Naga nunger nem lendong tulu bentsür arutsü anungji NPF-i secular tashi ajak longjemer taruba LS election nung tokteptsü aser tarutsü kümzüka ayutsü atema telemtetba agi, ta paisa ashi.
“NPF-i LS elections atema candidate metokteptsür saka Congress kijai PDA candidate madak takok mengutettsü. Politics inyakdang mapang kar nungbo asenoki tarutsü nung tetsükdaktsü ajurutsü indang mebilemi telemtetba agitsüsa akütelemtetba agitsüsa akümer aser tanü onoki Naga nunger atema bilema secular party (Congress) yaritsü lemtet,” ta NPF president-isa shisem.
“Congress yimsüsüba kübok küm aika timtema aruogo aser taku chiteper alir kati pei den toktepba party (Congress) indang tamaitsü nung vote agütsütsüba tasak lir. Saka Naga nunger tarutsü atema bilema party-i Congress candidate yaritsü mulungtet” ta Dr. Shürhozelie-isa ashi.
Secularism, CAB aser Naga yimten tebilemtsü onüktem atema NPF-i NDPP candidate tamakok ngudaktsütsü atema Congress nem vote agütsütsü, ta NPF legislature party leader, TR Zeliang-ia ashi.
NPF MLA 7 aser Aonglenden bye-election candidate Toshipokba nungertemi PDA sorkar yariba atema jembidang “parnok nija ajangzüktsü atema parnoki nübortem aser party-i tamang ayuba samatsü. Party toktsüba NPF lennirtemi party atema maaksü kecha bentsür maru saka iba ajanga parnok taküm piyong kangshitsü” ta TR Zeliang-isa ashi.
Iba senden nung mendenji Secretary General & MP (RS) KG Kenye liasü aser CEC Member P Longon-i sarasadem