LS election nung Tamil Nadu nungi aluyimer 111-i Modi den tokteptsü

New Delhi, March 23 (Agencies): Taruba Lok Sabha election nung Varanasi menden nungi Ato kilonser, Narendra Modi den tokteptsü atema Tamil Nadu nungi aluyimer 111 renemshidar; parnoki Varanasi Lok Sabha constituency nungi tokteptsü atema tenüng agütsütsü.
Aluyimertem tebilemtsü onük balala atema parnoki linük yimtiba nung takhangba aguja longkak aita liasü.
Tanü Tamil Nadu nung aluyimertem lenir, P Ayyakannu-i, state nungi aluyimer 111-i Varanasi menden nung Modi den tokteptsü, ta metetdaktsü.
National South Indian Rivers Inter-Linking Farmers Association nung Tir, Ayyakannu-i, BJP dang parnok manifesto nung aluyimertem takhangba inoksemdaktsütsü takhangba agüja Uttar Pradesh nung Modi den tokteptsü telemtetba agi, ta metetdaktsü.
Osangbener den jembidang “parnoki manifesto nung onoki akhangba onüktem inoksemra onoki Modi anema metokteptsü,” ta metetdaktsü.
“Onoki akhangba magizükra onoki election nung Modi anema tokteptsü,” ta paisa shisem.
Onoki agiba telemtetbaji All India Kisan Sangharsh Coordination Committee-ia pusemer, ta Ayyakannu-i ashi.
“Onoki BJP mesüra asen Ato kilonser Modi manemer. Sorkar makümdang Modi-i onok takhangbatem ataloktsütsü nangzük aser income anasü kümtsütsü nangzük,” ta pai ashi.
Paisa, aluyimer 300 Varanasi-i aotsü atema train ticket mekazüka yuogo, ta ashi.
Tiruvannamalai aser Tiruchirappalli na densema district balala nungi aluyimer 300 Varanasi-i aotsü, ta pai metetdaktsü.
Centre nung BJP-i aniba sorkari nationalized aser cooperative banks nungi aluyimertem dang sentsüh atoktsü nangzük aser aluyimer arishi küm 60 temapur nem ita shia pension sen 5,000 agütsütsü nangzük, ta paisa ashi.