LS menden atema candidate pezüi tokteptsü ; Bye election nung Cong aser NDPP tokteptsü

Kohima, Metsüremi/March 28 (TYO): Nagaland nung taruba Lok Sabha election ya nisung pezü tsüngda tetoktepba ka asütsü aser 26-Aonglenden Assembly Constituency bye-election nung Congress party aser NDPP na tsüngda dang tokteptsü.
Tanü nikongdang Kohima nung osangbenertem den jembidang Chief Electoral Officer (CEO) Nagaland, Abhijit Sinha, IAS-i, candidate tem tenüng agientsü atema ‘withdrawal’ anogo tatembangbuba anogo nung Parliamentary election nung tokteptsüpur candidate shingaia tenüng magien, aser State Assembly menden bye-election nung tokteptsüpurtembo candidate anati tenüng agienogo, ta metetdaktsü.
Nagaland nungi Parliament menden ka atema tokteptsüpurtemji- Congress party nungi candidate, K L Chishi, PDA-candidate aser NDPP-i shimba Tokheho Yepthomi, NPP nungi Hayithung Tungoe aser Independent candidate, Dr M M Thromwa Konyak nunger lir.
26-Aonglenden A/C Bye-election atema candidate pezü- Congress nungi Alemjongshi Longkumer, NDPP nungi Sharingain Longkumer, NPF nungi Toshipokba Longkumer aser NPP nungi O Tinu Longkumer nungeri nominations file süa liasü, ajisüaka NPF candidate Toshipokba aser NPP candidate Tinu nati tanü tenüng agienogo, ta Chief Electoral Officer (CEO)-isa metetdaktsü.
NPP Mokokchung unit president-i March 26 nungi Tinu samaogo, ta FIR agütsüba sülen anogo ka lir pai tenüng agiener. Ajisüaka Mokokchung police-i Tinu junga lir aser tanü tashi nungbo pa constituency-i meyipa arutsü, ta metetdakja liasü.
Election nung metokteptsü atema tenüng agienba sülen Tinu aser Toshipokba nati nija sasep nung sangdong balala agüja liasü, aser tenati sangdongbaji kanga temesüktep liasü.
“Chief Minister Neiphiu Rio aser Deputy Chief Minister Y Patton na lenisüba nung PDA sorkari temelenshi aser terenlok tulu bener aruogo, junga yimsüsüogo aser Nagaland state sorkar tashi itdaktsüogo,” ta metetdaktsü.
“Naga yimtenren ken o akhümketa latettsü atema India-Naga ken o jembiba nung PDA-i lenmang lapoktsür ama inyaker, aser ibaji ajaki pelaa agizükba den nungittsüla,” ta metetdaktsü.
Tenati mapang balala nung Chief Minister Rio aser NDPP Minister for Urban Development i/c of Mokokchung district, Metsubo Jamir na ajurua tena den külemi tangokba noksa den külemi tenati jembiba o social media nung prokdar.
Candidate anati tenüng agienba yong tangbo Congress candidate, Alemjongshi Longkumer aser PDA candidate aser NDPP-i shimba Sharingain Longkumer na tsüngda dang tokteptsü.
Menden anaprongla atema election ji April 11 nü anepdang 7:00 ako nungi nikongdang 4:00 ako tashi agitsü.