LS nung Congress, Left aser AIADMK-i YSR-TDP pusemtsü

New Delhi, Metsüremi 16 (Agencies): Congress party, CPM, AIADMK, AIMIM aser Aam Aadmi Party (AAP)-i BJP-i aniba NDA sorkar anema no-trust motion benokba pusemtsü aser Trinamool Congress aser Shiv Sena-ia Telugu Desam Party (TDP) aser YSR Congress Party nati NDA anema no trust motion benokba pusemtsü.
Andhra Pradesh state nem maongka balaka magutsüba onük nung tanep TDP-i NDA teloktep toktsütsüogo.
Tanü Lok Sabha nung TDP-i no-confidence motion benoktsü merang, saka Lok Sabha Speaker-i Tentonü (Hombar) tashi senden thinen.
Opposition party aikati no-trust motion pusemba tetezü ibaji House nung melamela agizüktetttsü, kechiyong House nung tajemba agia züngsem (MP) 50-i bosa ibaji pusemtsü.
NDA sorkar mapang nung tang mezüng no-trust motion benoker asutsü.
Lok Sabha nung Congress MP 48 lir, AIADMK MP 37, TDP MP 16, YSR Congress MP 9, CPM MP 9 aser AIMIM MP ka lir.
CPM-i, Centre-i lenla ajak nung tamakok angubaji metetdaktsütsüla, ta ashi.
CPM lenir, Sitaram Yechury-i, “BJP sorkar anema no-confidence motion benokbaji CPM-i pusemer. Andhra Pradesh nem maongka balaka agutsütsü ta nangzükba ama meinyakbaji tashioktsüba ka lir. Parnoki (BJP) lenla ajaklen tamakok angubaji metetdaktsütsü nüngdak,” ta ashi.
AIMIM tongti, Asaduddin Owaisi-i, kuli aika nung ajemdaker par party-i no-trust motion pusemer, ta ashi.
Paisa, “Tanü Lok Sabha nung MIM party-i no-confidence motion pusemtsü aser ibaji Modi sorkari State Reorganisation Act meinyakba atema dang masü saka lanurtem nem mapa agutsütsü aser Muslim tsürtem den minority tem nem ochi temeten agutsütsü nangzükba ama meinyakba atema pusemer,” ta metetdaktsü.
No-trust motion mezüng benokba party ji YSR Congress lir. Yashi TDP-ia parnoki iba motion pusemtsü ta sangdonga liasü.
Modi sorkar dang tejashi nung Metsüremi 8, 2018 nü TDP-i par Minister ana Modi sorkar nungi anendaktsüogo.
BJP MLA, Naqvi-i, “Party kobai koba lenmang shimerar onoki Parliament nung repranga atatsü. Iba ya election küm ka lir aser state ajaki takhangba agutsür. Iba ya inyakyim ka lir; election matongdang Parliament nung tama terenemshiba akar,” ta ashi.
AP nem maongka balaka magutsüba atema yashi YSR Congress-i Modi sorkar anema no-confidence motion benoka liasü. Idangyongjisa Andhra Pradesh chief minister aser TDP tongti, N Chandrababu Naidu-ia YSR Congress pusemtsü ta sangdonga liasü.
Telugu Desam Party (TDP)-i National Democratic Alliance (NDA) teloktep toktsüogo. Lok Sabha nung parnok MP 22 lir aser Rajya Sabha nung MP 6 lir. Ibaji ajanga BJP-i Lok Sabha nungbo timtem mangutsü saka Rajya Sabha nungbo timtem ajangshitsü.
Ajisüaka iba jagi NDA sorkar manokshir, kechiyong BJP MP 274 lir aser ibaji House nung züngsem tesadang- züngsem 272 dang nungi timba lir.
2014 küm election osang sangdongba sülen BJP-i parnoki menden 282 nung takok nguaka parnoki sorkar nung pre-election teloktep party tem dendaktsütsü ta sangdonga liasü.
Tanep tashi nung teloktep party tem densemabo Lok Sabha nung NDA züngsem 331 aser Rajya Sabha nung züngsem 79 liasü saka TDP-i NDA teloktep toktsüba sülen Lok Sabha nung NDA züngsem 315 aser Rajya Sabha nung züngsem 73 dang kümogo.