LS nung Dalit nunger anema inyakba onük nung o lemtep

New Delhi, August 11 (Agencies): Brihostibarnü Lok Sabha nung Dalit nunger anema inyakba onük nung o lemtep tenzükogo.
Tanü senden nung Kerala nungi Communist Party of India-Marxist (CPI-M) züngsem, P.K. Biju-i, Dalit nunger anema inyakba tatalokbatem tali bulua akumer, iba den külemi parnok loktiliba aser shisaliok jenjang nung temelenshi mali, ta ashi.
Tanü nikongdang Minister of State for Parliamentary Affairs, S.S. Ahluwalia-i Deputy Speaker, M. Thambidurai dang, sorkar bill tem masü saka Dalit nunger onük nung o lemteptsü atema temelaba meshia liasü.
Iba o lemtep tenzüka Kerala nung Alathur constituency nungi Lok Sabha züngsem, Biju-i, “Dalit nunger shilem 37 dak tema poverty line kübok lir aser minute 18 shia Dalit nunger ka anema inyaker,” ta metetdaktsü.
“Linük nung Dalit nunger kümzüktsü atema nenok ozüng peria lir, saka shirnoki onok kümzüktsü,” ta asüngdanga pa Ato kilonser, Narendra Modi dang nüburtem kümzüker ka chichia asütsüla, ta ashi.
Tawa Modi-i, ‘Dalit nunger masü saka pa anema tama inyakang’ ta jembiba dak sentakba nung Marxist MP, Biju-i, item ama sangdongji ajanga Dalit nunger anema inyakbaji süoki ia agitsüla ta kuli sayur, ta ashi.
Pai ashiba agi, ‘azükaru state ka’ ta süaka Gujarat anüdoklen tsütsü Dalit nunger tia ji kanga tajungbo masü.
“Ni Ato kilonser dang sangdong agütsüba kijaji masü saka mapa agia inyakang ta mepishir,” ta paisa ashi.
National Human Rights Commission (NHRC) osang nung ajemdaker Biju-i, Dalit nunger tanur aika arishi küm 5 majungdang asür aser tetsürtem azüng-zülutsü ashiba shilemji 40 dak tekübok lir, ta metetdaktsü.
“Dalit nunger anema inyakba tatalokbatem nokdangtsü atema yimtenren temelungtetba nüngdaker,” ta paisa shisem.

PM-i Parliament nung Dalit onük nung sangdong ka agütsütsüla: Mayawati
Ano külen tanü BSP tongti, Mayawati-i, Dalit nungner anema inyakba tatalokbatem onük nung Ato kilonser, Narendra Modi-i Parliament nung sangdong ka agütsütsüla, ta takhangba agütsüogo.
Tanü Parliament kima osangbenertem den jembidang taoba mapang Uttar Pradesh chief minister, Mayawati-i iba o jembia liasü.
“Uttar Pradesh densema state kar nung assembly elections agitsü mapang ana nung lia Dalit nunger Rohith Vemula soseta asüba, Gujarat, Una nung Dalit nunger lanur pezü dak azükba densema Dalit nunger anema inyakba tatalokba jenti ajanga BJP tenüng menüktsüogo,” ta Mayawati-isa ashi.
“Ozü party-i, Dalit nunger atema aria bilemtsüba dang masü saka Dalit nunger anema inyakertem nem temerenshi agütsütsü atema Ato kilonser nem nendaka inyakdaktsüner,” ta lai ashi.
Ato kilonser, Modi-i iba onük ya Parliament nung jembitsüla ta shia lai, “Pai (Modi) iba onük kimalen jembitetra pai senden nunga jembitettsü,” ta ashi.