LS Speaker-i MP ajak nem football ka ka agütsü

New Delhi, Mar 29 : Bodbarnü Parliament House, New Delhi nung Union Minister of Youth Affair & Sports, Vijay Goel-i Lok Sabha Speaker, Sumitra Mahajan nem football ka agütsüba, noksa nung angur. Linük nung football asaya ajungkettsü asoshi iba sentong nung nung Parliament züngsem ajunga nem football kaka agütsü.

New Delhi, March 29 (Agencies): India nung saisapong ajungkettsü nükjidong nung Bodbarnü sentong ka nung Parliament züngsem ajaki shilem agi aser iba sentong nung Lok Sabha Speaker, Sumitra Mahajan-i Parliament züngsem ajak nem football ka ka agütsü.
Mission XI Million Programme ajanga India linük ajunga nung football asaya prokshiba aser October ita nung FIFA U-17 Football World Cup alitsüba tali ajungkettsü asoshi iba sentong ya Ministry of Youth Affairs ajanga ayongzük.
“Sports Authority of India (SAI) aser MP teyaritep nung yimtsüng, block aser district level nung football ayasa sentong ayongtsüla. MPLADF amshia MP temi yimtsüng level nung telok balala dentetdakja football asaya sentong aser benjung balala ayongtsü akok,” ta iba sentong nung Union Sports Minister, Vijay Goel-i MP tem ajungshi.
Taküm October ita FIFA U-17 World Cup ya All India Football Federation (AIFF)-i yaritepa ayonger aser linük nung football asaya temaleni tali ajungkettsü nükjidong nung Union Sports Ministry ajanga ‘Mission 11 Million’ ya tenzüktsü aser iba sentong ajanga linük nung aliba tanur million 11 nem kaket reju aser sentong balala yanglua football tesayuba agütsür.
“Linük nung football asaya jenjang temabai ajungkettsü nükjidong nung sentong balala ayongzüka agidar. Mission XI Million ajanga linük nung aliba tanurtem ajungai football asayatsü maongka agütsütsü,” ta Goel-isa ashi.