LS Speaker-i Party ajak senden ayonger

New Delhi, April 22 (Agencies): Hombar, April 25, 2016 nungi tenzüktsü aliba Parliament senden junga mekatettsü südi ta bilema Lok Sabha Speaker, Sumitra Mahajan-i Deobarnü party ajak senden ka ayongogo.
Centre sorkari Uttarakhand nung Tir yimsüsüba benokba atema taitsüba aliba mapang ka nung iba senden tenzüktsü.
Tanabuba Budget senden April 25 nungi tenzüktsü, ajisüaka February 23 nungi tenzüka Rajya Sabha aser Lok Sabha naprong nung February 23 nü senden tembanga mapang atsülang, nungji iba ya senden tasen ka tenzüker ama asütsü.
Iba ya 16 Lok Sabha senden 8buba asütsü aser Rajya Sabha 239buba senden asütsü.
Opposition party temi state 10 nung tzünglu junga maruba aser tzü agi anüngba onüka süoka sashia jembitsü, iba dak sentakba nung karibo Chairman nem iba onük metetdaktsüogo.
Sorkar aitsütsü atema Congress renemdar aser Uttarakhand yimtenren onük nunga Congress-i tanga opposition party tema ayongsemer sorkar aitsütsü.
Brihostibarnü Rajya Sabha nung Congress deputy lenir, Anand Sharma-i Rajya Sabha Chairman, Hamid Ansari dang Rule 267 kübok onük ajak thinener bangzüng atema benokogo. Iba bangzüng ajanga democracy ajanga shimba Uttarakhand sorkar anentsüba aitsütsü aser Temzüng Arrla 356 kübok tim mesüi Tir yimsüsüba benokba magizüktsü benoker.
Uttarakhand onük nung Congress-i anogo ishikabosa senden nung timtem agütsütsü südi ta sorkari bilemdar.