LS Speaker Mahajan-i Congress MP 25 anentsü

New Delhi, August 03 (Agencies): Vyapam ochimashi ken o aser Lalit Modi ken o nung Foreign minister Sushma Swaraj den state CM ana, Vasundhara Raje aser Shivraj Singh Chouhan nunger pei menden nungi aludaktsütsüla, ta Congress-i aniba opposition-i akhangba ajanga tanü Parliament House anaprong nung rongrong tulu adoka liasü.
Senden nung rongrong adokdakja senden junga magitetdaktsüba atema tanü Lok Sabha Speaker Sumitra Mahajan-i anogo pongu asoshi Congress MP 25 tashi anentsüogo.
Tanü Congress Parliamentary Party senden nung Congress Tir Sonia Gandhi-i, BJP indang ‘onük tama aser temerenshi tesülen’ tangatetbaji Congress-i magizüker, ta ashi.
Laisa, “Kuli tejangja bener onoki tongtibang onük benoker, saka sorkari iba dak sentakba nung temerenshi agütsütsü memulunger,” ta ashi.
Tanü Rajya Sabha senden nung Congress züngsemtemi yimyim ayima rongrong adokdakjaka Union Minister Swaraj-i, Lalit Modi yariogo ta tai tongloktsübaji tamendakdak maka, “Lalit Modi nem visa agüjang ta ni British sorkar dang memepishi,” ta ashi.
Laisa, “Ni sangdong ka agüja iba onük ya ni jangjatsütettsü ta teimla nung ni hopta ana tashi senden-i arua liasü,” ta shisem.
LS nung Speaker-i Congress MP 25 anendaktsüba dak sentakba nung Sonia-i, India aser democracy asoshi iba ya tammang anogo ka lir, ta shiogo.