L&T aser MBDA nati joint venture (JV) ka tenzükogo

L&T nung Group Executive Chairman, A M Naik aser MBDA nung Chief Executive Officer, Antoine Bouvier na tsüngda Joint Venture asoshi tenangzütep agiba noksa yangi angur.

Delhi, February 14 (Agencies) : ‘Make in India’ inyakyim kübok India sorkari Defence telok nem maongka peria agütsütsü nükjidong yur Larsen & Toubro (L&T) aser European developer & manufacturer of missiles, MBDA telok na joint venture (JV) ka tenzükogo.
JV tenzükba ajanga missile aser missile inyakyim tsütsü tali awa oa inyakteta India armed force temi nüngdakbatem tongtsütettsü.
Joint Venture Company tenüng ‘L&T MBDA Missile Systems Ltd’ jaloktsüogo aser tesem tataktet ka nung amenoker inyaktsü, koba nungi tapoktsütem yanglua bener aotsü. Nüngdakba temelaba ajak ngutetba sülen iba mapa ya 2017 küm tom ka nungi mapa küma inyaktsü.
L&T nung Executive Chairman, A M Naik-i, “DRDO aser Indian Navy temi onok dak temulung kanga lemteta inyak yonga aruogo. Onoki India atema raradang amshiba oset teperi, command azüokba aser sensor systems, terenlok aser nüngdakba oset yangluba mapa nung küm 30 dak tema inyaktsüogo. Iba mapang onoki Ministry of Defence den kanga amalitepa inyaka liasü,” ta ashi.
MBDA nung Chief Executive Officer Antoine Bouvier-i, “Onoki India arm force den dang masü saka India nunger industry dena tesendaktep taroktiba agi shishilemba inyakyim ajak inyaka aru. Ibaji ajanga onoki yanglutetba aser technology balala sorkar meyong DPSUs (Defence Public Sector Undertakings) dangi belener aru aser Indian private sector nung company tulu aser small & medium-sized enterprises (SMEs) tem dena tesendaktep tajung yur inyaka liasü. JV tenzükba ajanga onok tesendaktep tali renloktsü. L&T ji onok asoshi India partner tetemsü asütsü ta ni agizüker,” ta ashi.
Company shilem 51 L&T meyong aser shilem 49 MBDA meyong asütsü. Parnoki India Foreign Direct Investment (FDI) temzüngi tuyuba ama inyaktsü. JV ya India nung register asütsü aser India temzüng nung India Company ama shishilembatsü.