Lt. General MM Naravane-i Assam nung Army semdang

Kohima, Aami/June 27, 2019 (TYO): Lieutenant General MM Naravane PVSM, AVSM, SM, VSM, General Officer Commanding in Chief, Eastern Command ajanga June 26 aser 27, 2019 anogotem nung Inspector General Assam Rifles (East) semdangba nung shilem ka ama Assam nung Army aser Assam Rifles formations semdanga liasü, ta PRO sangdong ajanga metetdaktsü.
Iba mapang MM Naravane-i Assam state nung security jenjang aser tang telungpur anema raraba maparentem asadanga liasü. Kasa mapang Assam nung security tensa indang Commander temi Naravane dang rasa ashi.
Maneni, June 27, 2019 nü Lt. General MM Naravane-i Headquarter IGAR (East) semdang, kong Major General GAV Reddy SC, VSM, IGAR (East)-i state nung security tensa balala dak sendakba indang rasa ashi.
Iba station nung lemzükja alir officer ajak den General Officer-i sensaksema liasü. Ketdangser tulu nungi tila tashi bendang agüja aser meranga inyakba ajanga Assam nung yimjung aser tesünep lidaktsüba inyakyim ajiteta pai parnok dang pelaba metetdaktsü.