LTM 42 buba lokti senden takok ngua mungogo

Mokokchung, Rongchii 27 (TYO): 42 buba Langpangkong Tzükong Mungdang (LTM) lokti senden Rongchii (April) 26 & 27 anogo ananü Mongsenyimti yimdak takok ngua mungogo. Iba lokti senden sentong nung LTM kübok aliba unit 37 nungi mungdanger noklang pezü shi adenshia shilem agia aden.
Taküm iba sentong nung alaka jaokertemji; PWD minister Wb. Tongpang Ozüküm, Industries & Commerce, NIDC Adviser & Chairman DPDB Mokokchung Wb. Imnatiba aser MLA Wb. Amenba Yaden par asem den ano tongti o jembirtemji; Wb. Senti Ao (IAS) aser Wb. I Pager Jamir (IFS) nungertem liasü.
42 buba LTM lokti senden nung item bangzüngtem renemer senshi; mezüngbuba nung 42 buba LTM-i bangzüng renema akaba ama, LTM-i Ao Senden inyakyim ajak nung nungita yaritsü. Tanabuba nung; LKM clean election dak sendakba mapa kanga meranga inyakba atema temulung achir aser tarutsü nunga kodangsa iba dak sendakba mapa inyakdir, LTM-i nungittsü lemtet.
Asembuba nung; Tuli nung ADC office aliba nungi D.C office ajungkettsü (upgrade) asoshi sorkar dangi bendangba cabinet-i agia lir, ibaji maneni inyaka aotsü atema tang nokdaka alir lenirtem den LTM office ajanga ajungshitsü lemtet. Pezübuba nung; Tuli nung Sub-Divisional Horticulture office ka lapoktsü 41 buba bangzüng nung alibaji maneni lepshia renema yuogo aser iba mapa tang teinyakdak asünung, maneni LTM office ajanga inyaktsü nungloktsü.
Pungububa nung; Langpangkong nung yimtsüngtem tsüngda inter-village road connectivity mapa küma arudang, koba yim lushi ajangdir, ali kiburi timtem magütsütsüsa village council-i reprangtsü LTM nem nungloktsür aser item mapa küma inyaktsü LTM-i achayangtsü. Trokbuba nung; Asetkong Tzüsangra lenmang atema special committee ka shima minister den ajurutepa plan project nung inoker mapa küma inyaktsü LTM office nem toktsü.
Tenetbuba nung; NPPC tanaben taküm shia arudaktsütsü asoshi State Govt. sabang nung jembir India sorkar den jembitsü atema Langpangkong nung aliba legislator par asem (3) den shisa lemsar, committee ka shimtsü LTM office ajanga inyaktsü lemteta liasü.
43 buba Langpangkong Tzükong Mungdang (LTM) anir aotsü atema item ketdangsürtem shimtet; Tir – M. Zülu Ozukum (Mongsenyimti), Tatong Tir – S. Temsu Pongen (Chuchuyimlang), Tongti Zülur – Lanu Pongen (Asangma), Repsem Zülur – Watitoshi (Wameken), Sen Zülur – Moarenba (Changtongya Yimsen) aser Kimen – Supongmatong (Chuchuyimlang) nungertem lir.