LTM-i terenlok mapatem mita reprangtsü bangzüngogo

Mokokchung, March 17 (TYO): Yisemyong nungi Unger tashi aser Merangkong nungi Mon tashi two Lane National Highway yangluba aser tanga terenlok mapatem inyakba atema Langpangkong Tzükong Mungdang (LTM)-i pelar, iba denji külemi contractors aser ketdangser ajak dang item mapa junga inyaktsü atema kanga nendaka inyakdaktsüner, ta LTM President, M. Zulu Ozukum, Convenor, LTM-CCR Marsanen Pongen aser General Secretary, Lanu Pongen nungeri külem sangdong ka ajanga metetdaktsü.
“Tesüiba mapang LTM tesem nung gari lenmangtem yanglua aruba otsü reprangdangra, 1933 küm nungbo lenmang atutsü atema machineries mesüra nüngdakba tanga hadirtem kec ha maliasü, Changtongya Conference nung LTM-i Amguri nungi Mokokchung tashi gari senzütsüsa lenmang yanglutsü lemtet. Iba mapang nungjagi Langpangkong tzükongsangertemi yimtsüng sasep mapa alem aser lenmang atu tenzük. Teyari mesüra senotsü kecha mengui iba project renem atema küm 13 agi,” ta sangdong nung shia lir.
“Nüburtem temelungtetba reprangteta tesülen Assam Provincial Government kübok PWD Department-i iba project agizük, aser tanübo National Highway kümogo. Iba ama tensa ka nung asen jakdang lenirtemi asen tarutsü atema bilemja mejembitetba timtem kanga ajurua aruogo,” ta parnokisa metetdaktsü.
“Ajisüaka tanübo India nung tanga state tem den medemdangra asen state nung mapa junga meinyaker. Tatishitsü agi, Assam nung lemzüktsüba kasa senotsü agi yangluba lenmangbo kanga junger saka Nagaland nungbo majung. Lenmang majungba atema contractors aser stakeholders-i tsüngsang-mopung aser tanga kuli tatemtsü ashibaji tagizüktettsüla masü,” ta parnoki metetdaktsü.
Anungji March 14, 2019 nü HQ nung LTM Coordination Committee for Roads (LTM-CCR)-i LTM tesem nung terenlok mapa balala repranga atatsü lemtet, aser contractors aser stakeholders ajak dang onok litsü nung mapa junga meinyakba memelatsü ta metetdaktsür,” ta kasa sangdong ajanga metetdaktsü.
Work Order nung aliba ama mapa junga inyaktsü atema LTM-i akokba lenmang ajak nung amalitepa yariteptsü, ta LTM-isa metetdaktsü.
LTM-isa, mapa inyakdang ki aser süngdonglidong raksatsüba atema agiba dak alaka ali kiburtemi ali agutsüba atemabo senotsü temenok magiba atema pelar; iba dak alia LTM-i nüburtem, linük tenzüker teloktem mesüra sorkar agencies dang Lokti Senden nung lemtetba ama Langpangkong tzükongsanger liji “Saru Maliba Li” ta sangdonger, ta metetdaktsüogo.
Anungji LTM-i saru tapu ajak memelar aser ibaji alema inyakra ibajibo nüburtem anemba mapa asütsü, ta züngshitsü aser magizüktettsü, ta Langpangkong Tzükong Mungdang (LTM)-isa metetdaktsüogo.