Luca Guadagnino ‘Lord of the Flies’ direct asütsü

Chiteni/July 30, 2019 (Agencies): Italy nunger film yanglur Luca Guadagnino nem ‘Lord of the Flies’ direct südaktsütsü atema Warner Bros. den jembidar, ta osang ajanga metetdaktsü. Iba film ya 1990 küm sayaba kasa nüngja ‘Lord of the Flies’ tanaben yangluba otsü ka asütsü, kong Luca nem direct aser produce südaktsütsü asoshi jembishinüdar.
1954 küm adokba novel – ‘Lord of the Flies’ koba William Golding-i zülua liasü, iba film yanglutsü asoshi Warner Bros.-i temeden nguogo. Iba project ya ‘Call Me By Your Name’ film direct asüsang Luca Guadagnino-i direct den külemi produce aütsü asoshi WB den jembishinüdar, ta Variety sangdong ajanga metetdaktsü.
2017 küm, iba film cast atema tetsür temeja amshia yanglutsü asalentong liasü saka iba nung aikati shishitepba ajanga iba maparen thinena liasü.
Iba film nung British nunger teburtem lisem lima ka nung taolen makai kümadoker aser parnok sasa kümzüka ayutsü atema telok ka tentetta achaayanga liyonga aoba indang asütsü.
Mezüngbo, iba film otsü zülutsü aser direct asütsü atema Scott McGehee aser David Siegel naprongla shima liasü. Kasa mapang tenati film nung tetsür melena tebur ang shilem agidaktsütsü asoshi tasa yanglu.
1954 küm adoba novel nung ajemdaker screen atema mezüng 1963 küm director Peter Brook-i film ka yanglua liasü. Iba sülen 1990 küm Harry Hook-i kasa kaket nung ajemdaker tanaben film yangluogo.